დადგინდა თურქულ შეკრებაზე მყოფი ჩვენი გუნდის ბოლო სპარინგ-მეტოქე. ცნობილია, რომ "ტორპედომ” გეგმით 3 თებერვალსაც უნდა ითამაშოს, მაგრამ ანთალიაში ქართული დელეგაციის ყოფნისას ბოლო მატჩში მოწინააღმდეგის ვინაობა დღემდე არ ვიცოდით.
   როგორც თურქეთიდან ჩვენი კლუბის საზოგადოებასთან ურთიერთობის სამსახურის უფროსმა რამაზ ჩხიკვაძემ შეგვატყობინა, 3-ში "ტორპედოს” ლუგანსკის "ზორია” დაუპირისპირდება. უკრაინელების სურვილი იყო მატჩი ჩვენი დისლოკაციის ადგილიდან 1 საათის სავალზე გამართულიყო, მაგრამ მთავარი მწვრთნელის გია გეგუჩაძის მოთხოვნა კატეგორიული იყო - "ზორიასთან” სპორტკომპლექს "მარდანზე” გვეთამაშა. მოგეხსენებათ, ამ თამაშიდან მეორე დღეს ჩვენი გუნდი უკან, საქართველოში მოემგზავრება. ამიტომ მოერიდნენ მწვრთნელები ფეხბურთელების წინა დღით მგზავრობით გადატვირთვას.
   "ზორია”, უკრაინის პრემიერლიგაში ასპარეზობს და 20 ტურის შემდეგ 12 ქულით XV ადგილი უკავია (სულ აქ 16 გუნდი თამაშობს). მის რიგებში დღეისათვის მხოლოდ ერთი ქართველი ირიცხება - ფორვარდი ჯაბა ლიპარტია. "ტორპედოს” სხვა გეგმიური სპარინგებისაგან განსხვავებით, უკრაინელებთან სპარინგი ნახევარი საათით გვიან - საქართველოს დროით 18 საათზე დაიწყება.
   უახლოეს საკონტროლო მატჩს რაც შეეხება, მას ჩვენი გუნდი საფეხბურთო ცენტრ "ტოპ კაპეს” მინდორზე, ხვალ, 1 თებერვალს გამართავს. "ტორპედოს” მეტოქე, ჩეხეთის გამბრინუსლიგაში XIV ადგილზე მყოფი ოსტრავას "ბანიკი” იქნება.