გორის "დილამ” თურქულ შეკრებაზე ბოლოსწინა ტესტ-მატჩი გამართა და რუმინეთის ლიგა I-ის აუტსაიდერ "მიოვენისთან” 0:2 წააგო. თემურ მახარაძის გუნდმა ორივე გოლი ბრაზილიელი აიზასგან მიიღო – 73-ე და 76-ე წუთებზე. მანამდე "მიოვენიმ” პენალტიც გააცუდა. ეს რაც შეეხება რუმინული საიტების ინფორმაციას.
"მსოფლიო სპორტი” "დილას” პრესატაშე ზურაბ კარტოზიას დაუკავშირდა, რომელმაც "დილას” შემადგენლობა და ახალი ამბები გვამცნო. გორელებმა "მიოვენისთან” ასეთი შემადგენლობით ითამაშეს: შეყრილაძე, ვალტერ ხორგუაშვილი, ქარქუზაშვილი, ახვლედიანი, ბეჭვაია, გიორგი ხუბუა, ჯოჯუა, ნოდარ ნოზაძე, ბარაბაძე, ახალკაცი, მდივნიშვილი. შეცვლაზე შევიდნენ: ილია ლომიძე, სადაღაშვილი, ივანე კანდელაკი, შოთა კაშია, ხოჯავა.
როგორც ხედავთ, "დილამ” არაოპტიმალური შემადგენლობით ითამაშა. კარტოზიას თქმით, გუნდში დარჩება ხორვატი მეკარე მარინ სკენდერი, ხოლო სერბი ნახევარმცველი ვლადიმირ კრნჟინაცი, სავარაუდოდ, სხვა კლუბს მოძებნის. და რაც შეეხებათ მორიგ პოტენციურ ახალწვეულებს...
"შაშიაშვილზე და განუგრავაზე ვერაფერს გეტყვით, მაგრამ სანდრო გურულზე ნამდვილად ვიცი. მისი ჩამოსვლა რეალურია. ერთი მატჩი დაგვრჩა თურქეთში, 5 თებერვალს ბელარუსის ჩემპიონ ბატე-სთან ვითამაშებთ, 6-ში კი გუნდი საქართველოში დაბრუნდება”, – გვითხრა კარტოზიამ.
გურული ამჟამად ლვოვშია და ვნახოთ, გადაიბირებს თუ არა "დილა” "კარპატის” შემტევ ნახევარმცველს.

ილია ნანობაშვილი