ესპანეთში შეკრებაზე მყოფმა თბილისის "დინამომ”, მორიგი ამხანაგური თამაში ჩინეთის ჩემპიონ "გუანჯოუსთან” ჩაატარა და 0:3 დამარცხდა.
"დინამოს” ვებგვერდის ცნობით, განვლილ მატჩში ტრავმების გამო არ უთამაშიათ: მერებაშვილს, ძარიას, თომაშვილს, ხოჭოლავას, ანდრეუს, რეხვიაშვილს, ხმალაძეს, პარუნაშვილსა და კაკუბავას.
"დინამოს” სასტარტო შემადგენლობა შემდეგი გახლდათ:
ლორია, ოდიკაძე, ჰომოლა, კვეკვესკირი, ლომიძე, პაპავა, ალვარო, კოშკაძე, ჩისკო, გოგუა, რობერტინიო.
"გუანჯოუმ” ანგარიში მე-11 წუთზე გახსნა. პირველივე ტაიმში, ტრავმირებული ჰომოლას ნაცვლად მოედანზე ჯიღაური შემვიდა, ხოლო შესვენებამდე, "დინამომ” კიდევ ერთი ცვლილება განახორციელა – ჩისკოს მაგივრად, თამაშში იაგუე ჩაერთო. 39-ე წუთზე, მსაჯმა უხეში თამაშისთვის გოგუას ყვითელი ბარათი აჩვენა. შესვენებამდე ანგარიში აღარ შეცვლილა.
მეორე ტაიმის დასაწყისში ალვარო სანდრო გურულმა შეცვალა. 57-ე წუთზე, მსაჯმა ოდიკაძე უხეშობისთვის "გააყვითლა”. 70-ე წუთზე, ჩინელებმა თბილისელთა კარი კიდევ ერთხელ აიღეს – 2:0. გაშვებული გოლიდან მალევე, რობერტინიო კოტომ ჩაანაცვლა. 76-ე წუთზე ყვითელი ბარათი კვეკვესკირმა მიიღო. 79-ე წუთზე, ტრავმირებული კვეკვესკირის მაგივრად მოედანზე რობერტინიო დაბრუნდა. 82-ე წუთზე, მსაჯისგან "ყვითელი” ჯიღაურმა დაიმსახურა. 86-ე წუთზე, "დინამოს” კარი "გუანჯოუს” ბრაზილიელმა ლეგიონერმა მარიკმა აიღო. ეს უკანასკნელი, ერთი წუთის შემდეგ მსაჯმა გააფრთხილა.