თბილისის "დინამოს” კიდევ ერთი ახალწვეული ჰყავს – საუბარია "ოკლენდის” 28 წლის საყრდენ ნახევარმცველ ანდრეუ გერაო მაიორალზე.

შეგახსენებთ, რომ გუშინ, ეროვნული სტადიონის საპრესკონფერენციო დარბაზში ჩვენი ქვეყნის ყველაზე ტიტულოვანმა გუნდმა ორი ახალწვეული, გიორგი მერებაშვილი და ირაკლი ძარია წარადგინა. დღეს კი, როგორც ცნობილი გახდა, თბილისურმა კლუბმა კიდევ ერთი ესპანელის, ანდრეუს ტრანსფერი გაჩარხა.

ანდრეუ, რომელიც პოზიციით საყრდენი ნახევარმცველია, 1983 წელს ბარსელონაში დაიბადა და სწორედ ადგილობრივი "ბარსას” აღზრდილია. 2003-2005 წლებში ის "ბარსელონა B”-ს ღირსებას იცავდა, სადაც მხოლოდ 12 მატჩში მიიღო მონაწილეობა და "მალაგას” დუბლებს მიაშურა. კარიერის საუკეთესო წლები ანდრეუს ხიხონის "სპორტინგში” ჰქონდა, სადაც ოთხი სეზონი დაჰყო და პრიმერა დივიზიონის მატჩებშიც მიიღო მონაწილეობა. სულ კი ხიხონელთა რიგებში 41 მატჩი ჩაატარა და 1 გოლი გაიტანა. შემდეგ იყო ვარშავის "პოლონია”, რომელშიც ანდრეუ ერთი სეზონის მანძილზე თამაშობდა და 34 მატჩში ერთადერთი გოლი დერბიში "ლეგიას” გაუტანა. ბოლო 4 თვის მანძილზე კი "დინამოს” ახალწვეული ახალი ზელანდიის "ოკლენდში” თამაშობდა. მან დეკემბერში კლუბებს შორის მსოფლიო ჩემპიონატშიც მიიღო მონაწილეობა, სადაც "ოკლენდი” იაპონურ "კაშივა რეისოლთან” 0:2 დამარცხდა.

ანდრეუს ტრანსფერს გამოეხმაურა "ოკლენდის” ოფიციალური საიტიც:

"ანდრეუ ჩვენთან ერთად მხოლოდ ნახევარი სეზონის მანძილზე იყო, მაგრამ მისი კლასი შეუმჩნეველი არ დაგვრჩენია. ვფიქრობ, ასეთი დონის ფეხბურთელი ნებისმიერ კლუბს გააძლიერებს. მადლობას ვუხდი ანდრეუს და კარიერაში წარმატებებს ვუსურვებ”, – ეს "ოკლენდის” მთავარი მწვრთნელის, რამონ ტრიბულეჩის სიტყვებია.

"ოკლენდში კარგი პერიოდი გავატარე, მაგრამ ჩემი მიზანი ევროპაში დაბრუნება და აქ თამაში იყო. ახლა კი ამის საშუალება მომეცა”, – ამბობს ანდრეუ.