თემურ მახარაძე უმაღლეს ლიგაში ყველაზე გამოცდილი და სტაჟიანი მწვრთნელია. 61 წლის სპეციალისტის დანიშვნის შემდეგ "დილა" მოფერიანდა, საგაზაფხულო ეტაპს კი ამ კლუბისთვის უჩვეულო ამბიციებით ხვდება - გორელებს ევროთასებზე ღირსეული თამაში სურთ.

"დილა" ანთალიაში მეორე შეკრების ჩასატარებლად ამ შემადგენლობით გაემგზავრა:

მეკარეები: მირზა მერლანი, ბექა შეყრილაძე
მცველები: კახა ალადაშვილი, ილია ლომიძე, გიორგი ქარქუზაშვილი, შოთა კაშია, გიორგი ახვლედიანი, დავით მეგრელიშვილი, ვალტერ ხორგუაშვილი;
ნახევარმცველები: გიგა ბეჭვაია, ირაკლი ლექვთაძე, ნოდარ ნოზაძე, ლადო ჯოჯუა, რომან ახალკაცი, გიორგი ხუბუა, რეზო ჯიქია, ნიკა სადაღაშვილი, ბესიკ დეკანოიძე, გოჩა ხოჯავა, ლევან მდივნიშვილი.
თავდამსხმელები: რეზო ბარაბაძე, გიორგი ილურიძე, დავით ჩაგელიშვილი.

ანთალიაში გამგზავრებამდე თემურ მახარაძეს ვესაუბრეთ.

- როგორც ვიცით, სელექცია ჯერ არ დაგისრულებიათ.
- ასეა, სელექცია გრძელდება, მოთამაშეებს დღემდე ვაკვირდებით და მოსამზადებელ ეტაპს, საკონტროლო შეხვედრებს საამისოდ გამოვიყენებთ. ანთალიაში ბევრი მოთამაშე მიგვყავს, მაგრამ ეს არ ნიშნავს, რომ, ვინც ჩვენთან მოემზადება, გუნდში ყველა დარჩება.

ვინც მოთხოვნებს ვერ დააკმაყოფილებს, წასვლა მოუწევს. ზოგიერთი ახალი მოთამაშეც თურქეთში დაგვემატება.

- ახლანდელი შემადგენლობა არ გაკმაყოფილებთ?
- გაძლიერებაზე ჩვენ კი არა, "ბარსელონა" არ იტყვის უარს, ასე რომ, ოპტიმალურ შემადგნელობას კვლავაც ვეძებთ.

- სალუქვაძის ამბავი ცნობილია, რამდენად რეალურია კიევის "დინამო 2" - ის ცენტრალური მცველის, თემურ ფარცვანიას დამატება?
- ყველაფერი ანთალიაში გაირკვევა. ჯერ ზუსტი პასუხი სალუქვაძის თაობაზეც არ გვაქვს.

- რომელ ახალწვეულს გაუფორმეთ კონტრაქტი?
- ინწკირველს, ბეჭვაიას, კაშიას, ლექვთაძეს, ხუბუას, ჯიქიას... ხოჯავა კონტრაქტს თურქეთში გააფორმებს.

- ვფიქრობ, "დილას" გადამეტებულ იმედებს უკავშირებენ.
- ეს რატომ?

- მოსამზადებლად მხოლოდ ერთი თვე გაქვთ, რაც გუნდის ჩამოსაყალიბებლად ძალიან მცირე დროა.
- გეთანხმებით, ძლიერი შემადგენლობა შეიკრიბა, მაგრამ საქმეს მხოლოდ ეს ვერ უშველის - ახალი გუნდის ჩამოსაყალიბებლად და შესათამაშებლად საჭიროა დრო, რომელიც მართლაც არ არის საკმარისი და ეს ჩვენი ყევლაზე დიდი პრობლემაა. ზამთარში მოსამზადებლად მხოლოდ თვე-ნახევარი გვაქვს, ზაფხულში კი ეს დრო გაცილებით მეტია.

თუმცა, სერიოზული გუნდი მანდეს და ვალდებული ვარ, თითოეული დღე მაქსიმალურად ეფექტურად გამოვიყენო. ამიტომ ვანიჭებ ანთალიურ სპარინგებს განსაკუთრებულ მნიშვნელობას. უიმედოდ მტერი იყოს, რადგან ვმუშაობ, იმედიანადაც ვარ.

- ყველას გვაინტერესებს, "დილაში" ისეთი რა პირობებია, რუსეთის პრემიერლიგის მოთამაშეებიც რომ მოდიან?
- მართლაც სერიოზული პირობები შეგვიქმნეს, ფინანსურიც, მოსამზადებელიც და პრობლემების მოგვარებაშიც ყველანაირად გვეხმარებიან. გარდა ამისა, აშენებენ სტადიონს, სადაც ბაზაც განთავსდება. გუნდის მოსამზადებლად ეს ძალიან მნიშვნელოვანი საქმეა. ნეტავ, ასე იყოს ყველა კლუბი, მაშინ ქართულ ფეხბურთს სერიოზული წინსვლა დაეტყობა, ხალხიც ჩემპიონატისკენ შემოტრიალდება.

თავი დავანებოთ იმას, რომ "დილას" მე ვავარჯიშებ, კლუბში მიმდინარე პროცესებს გარედან, გულშემატკივრის პოზიციიდან შევხედოთ - კიდევ ერთი ამბიციური გუნდი ქართულ ფეხბურთს აუცილებლად წაადგება.

- და რა არის ამ ამბიციური გუნდის მიზანი?
- საუკეთესო რვა გუნდში მოხვედრა და საქართველოს თასის მოპოვება.

- კეთილი და პატიოსანი, მაგრამ, დიდია ალბათობა, გორის სტადიონის განახლება საგაზაფხულო ეტაპამდე ვერ დასრულდეს. მიზნის მიღწევა შინაური კედლების გარეშე კარგი პირობებით და ძლიერი შემადგენლობითაც კი გაგიძნელდებათ.
- რას ვიზამთ, შეიძლება, სამუშაოები პირველი შეხვედრისთვის ვერ მოესწროს, მაგრამ მიზნებს ესეც ვერ შეგვიცვლის.

- მანამდე სად ითამაშებთ? იმედია, არა "ქართლის" სტადიონზე, სადაც სამარცხვინო გასახდელებია და, საერთოდაც, უმაღლესი ლიგის მოთხოვნებს ვერ აკმაყოფილებს.
- ახლა ალტერნატიული ვარიანტები განიხილება და ვნახოთ.

- რეგიონის გუნდებში განსაკუთრებული მოთხოვნაა, რომ ადგილობრივებმა ითამაშონ, ისე ქომაგები მწვრთნელს არ სწყალობენ. ასეთ ამბიციურ გუნდში მოსახვედრად რამდენი გორელია მზად?
- ამას დრო გვაჩვენებს. მეც დიდი სურვილი მაქვს, რაც შეიძლება მეტი ადგილობრივი წარმოვაჩინო. მაგრამ მხოლოდ იმის გამო, რომ გორელია, ვერავის ვათამაშებთ.