გუშინ ქუთაისის "ტორპედომ" ანთალიურ შეკრებაზე პირველი ამხანაგური მატჩი ითამაშა და რუმინულ "ბრაშოვთან" 0:2 წააგო.

"ბრაშოვი" რუმინეთის ჩემპიონატში ამ დროისთვის მე-12 ადგილზეა. მიმდინარე მოსამზადებელ პერიოდში "ტორპედოსთვის" ეს მეორე შეხვედრა იყო და, ცხადია, ასეთ დროს შედეგი უმთავრესი არ არის.

"ტორპედოს" ვებგვერდის ცნობით, მატჩი საინტერესო გამოდგა. დავით დიღმელაშვილის პასს ნიკა საბანაძემ არაზუსტი თავური მიაყოლა, სიზუსტე დააკლდა რევაზ გოცირიძესაც. რუმინელები კი მე-20 წუთზე დაწინაურდნენ ბლაჟე ოლიოვსკის გოლით.

თორნიკე თარხნიშვილმა შორიდან სცადა გატანა, გოცირიძეს უკეთესი საგოლე შანსიც ჰქონდა, მაგრამ მანაც ააცილა. გიორგი დათუნაიშვილის დარტყმას კი მცველი გადაეღობა.

გიორგი ლემონჯავა და გრიგოლ დოლიძე - "ტორპედოს" საიტის ცნობით, ისინი, შესაბამისად, მარცხენა და მარჯვენა ფლანგებიდან უქმნიდნენ პრობლემებს მეტოქეს.

საუკეთესო საგოლე შანსი ჰქონდა დიღმელაშვილს, რომლის დარტყმა მეკარემ მოიგერია. ანგარიშის გათანაბრება გივი იოსელიანს შეეძლო, მაგრამ ბურთი მცველმა მოიგერია.
მეორე გოლი "ბრაშოვმა" კონტრშეტევით გაიტანა, 88-ე წუთზე თავი პრიკოპმა გამოიჩინა.

"ტორპედო": მიგინეიშვილი, იოსელიანი, კვახაძე (მირცხულავა 72), ფარულავა, ლემონჯავა, დოლიძე (რიგვავა 62), დიღმელაშვილი (ფირცხალავა 69), დათუნაიშვილი, თარხნიშვილი (შერგელაშვილი 69), საბანაძე, გოცირიძე.

"ბრაშოვის" საიტი იუწყება, რომ მათმა გუნდმა მატჩი კარგად დაიწყო და პირველ ტაიმში არაერთი სახიფათო მომენტი შექმნა. რუმინელები აღიარებენ, რომ მეორე ტაიმში ქართველები მეტს უტევდნენ, მაგრამ ეს შედეგზე არ ასახულაო.

შეხვედრას დაესწრო საქართველოს ნაკრების მთავარი მწვრთნელი თემურ ქეცბაია. "ბრაშოვის" ვეგბერდს მან უთხრა, თქვენი გუნდიდან უდოჯი (ნიგერიული წარმოშობის ბულგარელი) მომეწონა, სწრაფია და მარცხენა ფლანგიდან პრობლემების შექმნა შეუძლიაო.

ტორპედოელებს შავი სამკლავური ეკეთათ - მათ პატივი მიაგეს გარდაცვლილ მერაბ მეგრელაძის ხსოვნას.

მომდევნო საკონტროლო შეხვედრას "ტორპედო" დღეს გამართავს ზაქათალის "სიმურგთან" და მოედანზე ისინი გავლენ, ვისაც გუშინ არ მოუწია "ბრაშოვთან" თამაშმა