მთავარ ფოტოზე კონსტანტინე გაბაშვილი

”მეტალურგი” (რუსთავი) - ”სპარტაკი” (ცხინვალი) 1:1 (1:0)

გოლები: 1:0 ტატანაშვილი (42. ჯაფარიძის პასით), 1:1 კ. გაბაშვილი (57. შონიას პასით)

13 თებერვალი 2012 წელი. რუსთავი. ”ფოლადი”

”მეტალურგი”: ბედიაშვილი, ჯაფარიძე, გ. კვარაცხელია (კაპ.), სეთურიძე, მახვილაძე, ი. მაისურაძე, ქავთარაძე, რაზმაძე, დობროვოლსკი, ტატანაშვილი, სიხარულიძე.

შეცვლაზე შევიდნენ: კურუ, ს. თოდუა, გავაშლიშვილი, თექთურმანიძე, გ. ჭედია, გეწაძე, ოთარიშვილი, ხოხონიშვილი, ექვთიმაშვილი.

”სპარტაკი”: ნადირაძე, ჭაფოძე, დ. ლომაია, ორბელაძე, ნ. მაისურაძე, გ. ჩივაძე, შარაშენიძე, ვ. კილასონია, თ. შონია, ი. სამხარაძე, ლ. მელქაძე.

შეცვლაზე შევიდნენ: ტეტუნაშვილი, ჩაფიძე, გუგა მიქაძე, კ. გაბაშვილი, მ. ჯიშკარიანი.

მიმდინარე სეზონის მეორე ნახევრისთვის სამზადისში მყოფმა ცხინვალის ”სპარტაკმა” ჩემპიონატის განახლებამდე დასკვნითი ამხანაგური მატჩი გამართა. ვლადიმერ ხაჩიძის გუნდი ”მეტალურგს” რუსთავში გაეჯიბრა და 1:1 ფრე ითამაშა. აღსანიშნავია ის, რომ გარკვეული პაუზის შემდეგ, ”სპარტაკის” რიგებში გიორგი ჩივაძემ ითამაშა. თუმცა ამაზე ქვემოთ, მანამდე კი ”ფოლადზე” გამართულ ამხანაგურ მატჩს დავუბრუნდეთ.

რუსთავში გამართული მატჩი საინტერესოდ, გარდამავალი უპირატესობით წარიმართა. სპარტაკელთა მეკარე გიორგი ნადირაძემ დიმიტრი ტატანაშვილს ორი რთული ბურთი კი აუღო, მაგრამ რუსთაველთა თავდამსხმელმა მესამე ცდაზე ანგარიში გახსნა. თუმცა, ეს ტაიმის მიწურულს, 42-ე წუთზე მოხდა. მანამდე კი სტუმრებს შეეძლოთ დაწინაურება, მაგრამ ლევან მელქაძის, თემურაზ შონიასა და ვარლამ კილასონიას მცდელობებს შედეგი არ მოჰყოლია.

მეორე ტაიმში ”სპარტაკმა” უკეთ ითამაშა და სწრაფი გოლით წონასწორობა აღადგინა - 57-ე წუთზე თეიმურაზ შონიამ გადაცემა ჩაჭრა, რაც კონსტანტინე გაბაშვილმა დააფასა და ”მეტალურგის” ავსტრიელ მეკარე ბერტი კურუს კარი დალაშქრა. დარჩენილ დროში ორივე გუნდს არაერთხელ შეეძლო ბურთის გატანა, მაგრამ მეტოქეებმა თითო გოლი იკმარეს.

გიორგი ჩივაძე ”სპარტაკში” ადრეც თამაშობდა

... რაც შეეხება 27 წლის ნახევარმცველ გიორგი ჩივაძეს. თბილისის ”დინამოსა” და საბჭოთა კავშირის ნაკრების ლეგენდარული კაპიტნის, ალექსანდრე ჩივაძის ვაჟი, თბილისის გუნდებში, ”ლოკომოტივსა” და ”მერანში” ასპარეზობდა, თამაშობდა ცხინვალის ”სპარტაკშიც”, ბოლოს კი ბოლნისის ”სიონში” გამოდიოდა. თუმცა ტრავმისა და სარეაბილიტაციო კურსის გამო, წელიწადზე მეტია, რაც არ უთამაშია. ჩივაძე ”სპარტაკში” ემზადება და მისი საკითხი წესით ამ დღეებში უნდა გადაწყდეს.

http://fcspartak.ge