ბანერი

სიახლე

თურქული შეკრების პირველი საკონტროლო მატჩი, ქუთაისის "ტორპედომ” გეგმის მიხედვით, რუმინეთის "ბრაშოვთან” გამართა და 0:2 დამარცხდა. ცნობილი ქართველი ფეხბურთელის მერაბ მეგრელაძის გარდაცვალების გამო, ჩვენმა გუნდმა ეს ორთაბრძოლა შავი სამკლავურებით ჩაატარა. შეხვედრის დაწყებას წინ წუთიერი დუმილიც უსწრებდა.
   მატჩი სწრაფ ტემპში დაიწყო და წვიმის მიუხედავად საკმაოდ საინტერესო ორთაბრძოლაში წარიმართა. უპირატესობას თავიდანვე "ტორპედო” დაეუფლა, მაგრამ გოლამდე ქართველებმა საქმე ვერ მიიყვანეს. მე-15 წუთზე დავით დიღმელაშვილის დაწყებული კომბინაცია ნიკა საბანაძის უზუსტო თავურით დასრულდა. ორიოდე წუთში რევაზ გოცირიძე ურტყამს არაზუსტად. მე-20 წუთზე კი ანგარიში გაიხსნა. რუმინელთა იშვიათ შეტევას, ჩვენი დაცვის შეუთანხმებელი ქმედება მოჰყვა და "ბრაშოვის” მაკედონიელმა ფორვარდმა ბლაჟე ილიოვსკიმ საკუთარი გუნდი დააწინაურა - 0:1.
   ქუთათურები თამაშის სურათიდან გამომდინარე ალოგიკურმა გოლმა არ დააბნია და პირველი ტაიმის დარჩენილი დრო მათი საგრძნობი უპირატესობით აღინიშნა. 26-ე წუთზე თორნიკე თარხნიშვილის მაღალი ტრაექტორიით გაკეთებული გადაცემა გოცირიძის თავურით დასრულდა, მაგრამ რეზოს დარტყმას ძალა აკლდა და ბურთი რუმინელთა კიპერის იოლი ნადავლი გახდა. ცოტა ხანში თავად თარხნიშვილი ურტყამდა შორი დისტანციიდან - ბურთმა სანტიმეტრებში ჩაუქროლა ბრაშოველთა კარის ძელს.
   30-ე წუთზე ჩვენმა გუნდმა სწრაფი შეტევა განახორციელა და ისე მოხდა, 4 ტორპედოელი 2 რუმინელის წინაშე აღმოჩნდა. ბურთი გოცირიძემ მოიხელთა და მეტოქის საჯარიმო მოედნის ხაზიდან მისგან "გასროლილი” ბურთი მცირედით აცდა "ბრაშოვის” კარის ჩარჩოს. კიდევ ერთი რეალური ხიფათის შექმნაში მონაწილეობა დიღმელაშვილმა გიორგი დათუნაიშვილმა მიიღეს. "გიგუშას” კარში გაგზავნილი ბურთი ცარიელი კარიდან რუმინელ მცველს გამოაქვს
   აქვე იმის შესახებაც, რომ 26 იანვარს ზაქათალის ”სიმურგთან” დაგეგმილი მატჩის გამო, გია გეგუჩაძემ თადარიგში მხოლოდ 5 ფეხბურთელი (კუპატაძე, მირცხულავა, რიგვავა, ფირცხალავა, შერგელაშვილი) დააყენა, რომელთაგან მატჩში ჩართვა კიპერის გარდა ყველას მოუწია.
   ასევე "ტორპედოს” უპირატესობით წარიმართა მეორე ტაიმი - განსაკუთრებით მისი საწყისი პერიოდი. აქტიურობდნენ ჩვენი ფლანგელები, სადაც მარცხენა მცველის რანგში გიორგი ლემონჯავა იყო, ნახევარდაცვაში კი, მეტწილად მარჯვნიდან გრიგოლ დოლიძე უქმნიდა პრობლემებს მეტოქეს. მათი ფლანგური ჩაწოდებები ყოველთვის ხიფათის მომტანი იყო "ბრაშოვისთვის”.
   ყველაზე რეალური მომენტი ჰქონდა დიღმელაშვილს, რომელმაც დოლიძის ჩაწოდებულის მცველთაგან მოგერიებულს დაჰკრა ძლიერად - ბრაშოველთა პორტუგალიელმა კიპერმა მისი გუნდი აშკარა გოლს გადაარჩინა. 53-ე წუთზე საბანაძემ შექმნა მორიგი ხიფათი, მაგრამ მის მიერ დაბალი ტრაექტორიით გაგზავნილ ბურთს გოდინიო ეუფლება იოლად.
   გეგუჩაძის მიერ განხორციელებულ პირველ ცვლილებას სათამაშო სქემის გადაწყობა მოჰყვა. დოლიძის ნაცვლად შემოსულმა დათა რიგვავამ მარჯვენა მცველის ადგილი დაიკავა, იქ მანამდე მოთამაშე გივი იოსელიანმა კი ნახევარდაცვაში წაიწია.
   მატჩის დამთავრებამდე შექმნილი, გოლთან ყველაზე ახლოს მყოფი მომენტი, სწორედ იოსელიანის სახელს უკავშირდება. ეს მოხდა 81-ე წუთზე, როცა საბანაძისა და გოცირიძის მიერ გათამაშებული "კედლის” შემდეგ ბურთი გივის მიუვიდა, მან დარტყმა არ დააყოვნა, მაგრამ რუმინელმა მცველმა კვლავ კარის ხაზიდან შეძლო ბურთის გამოტანა.
   მთელი გუნდით გასათანაბრებელ შეტევაზე გადასულ "ტორპედოს” დაცვას, 89-ე წუთზე მეტოქის კონტრიერიში გამოეპარა და მიგინეიშვილთან პირისპირ ერთბაშად 4 რუმინელი აღმოჩნდა. საგოლე დარტყმის შემსრულებელი პრიკოპი გამოდგა - 0:2.
   "ტორპედომ” "ბრაშოვთან” სპარინგი ასეთი შემადგენლობით გამართა: მიგინეიშვილი, იოსელიანი, კვახაძე (მირცხულავა 72), ფარულავა, ლემონჯავა, დოლიძე (რიგვავა 62), დიღმელაშვილი (ფირცხალავა 69), დათუნაიშვილი, თარხნიშვილი (შერგელაშვილი 69), საბანაძე, გოცირიძე.
   ხვალ, ჩვენი გუნდი აზერბაიჯანის ჩემპიონატში ამჟამად მე-9 ადგილზე მყოფ "სიმურგს” ეთამაშება. მატჩი თბილისის დროით 16 საათზე დაიწყება.

რეიტინგი: 0.0/0

კატეგორია: |

ნანახია: 1161 |

ავტორი: სტუმარი |

თარიღი: 2024-11-22 |

კომენტარები (0)

სულ კომენტარები:: 0

სამართავი პანელი

ძებნა

გამოკითხვა

რეკლამა

რეკლამისთვის ან ბანერის გაცვლისთვის მოგვმართეთ აქ: ადმინთან კონტაქტი

ბოლო თამაშები

დილა გორი 0 - 0 კოლხეთი ფოთი
ტორპედო 2 - 1   მერანი მარტვილი
ზესტაფონი 5 - 1     დინამო
გაგრა           1 - 0     ვიტ ჯორჯია
სიონი           0 - 3     დილა გორი
ბაია     1 - 1     ტორპედო
მეტალური   0 - 0    ზესტაფონი
კოლხეთი ფოთი      1 - 0    სპარტაკი
მერანი მარტვილი   2 - 1 დინამო
მერანი მარტვილი   0 - 2 ზესტაფონი