უმაღლესი ლიგის საქართველოში დარჩენილმა გუნდებმა სეზონის საგაზაფხულო ეტაპისთვის მზადების პროგრამით მორიგი ამხანაგური მატჩი გამართეს. თბილისში, საფეხბურთოს სკოლა "საბურთალოს” ხელოვნურსაფარიან მოედან "მარაკანაზე” ერთმანეთს ბოლნისის "სიონი” და მარტვილის "მერანი” დაუპირისპირდნენ. მატჩი მალხაზ ჟვანიას გაწვრთნილებმა 2:0 მოიგეს, რითაც 2012 წელს მოგებულ მატჩებს დაუდეს სათავე (მანამდე "მერანმა” 3 საკონტროლო მატჩი გამართა და 2 წაგების (0:2 "ტორპედოსთან” და 1:2 "ზესტაფონთან”) შემდეგ, ცხინვალელებთან ფრეს (2:2) გამორჩა).

ანგარიში მე-19 წუთზე გიგა ბოხუამ გახსნა. მატჩის ძირითადი დროის დამთავრებამდე 10 წუთით ადრე, ბოლნისელ ლევან ჩხეტიანს მიეცა გათანაბრების შანსი, მაგრამ მის მიერ შესრულებული პენალტი გიზო შენგელიამ მოიგერია. კიპერმა ამ ეპიზოდში კიდევ ერთხელ ივარგა, როცა ზურაბ ხურციძის დამატებულიც მოიგერია. 88-ე წუთზე ლაშა ჩალაძემ ზუსტი დარტყმით საბოლოო შედეგი დააფიქსირა.

გაგაცნობთ მეტოქე გუნდების შემადგენლობებს.

"სიონი”: I ტაიმი - ბობღიაშვილი, კობაურ, სვანიძე, ქემოკლიძე, მანჩხავა, ოლეგ გველესიანი, მეტრეველი, დავით ბოლქვაძე, როინ ონიანი, ჭანკოტაძე, უგულავა; შეცვლაზე შევიდნენ - ზუხბაია, ხურციძე, ლევან ჩხეტიანი, ხიდაშელი, ისიანი, გაბრიჭიძე, საბა ლომია, ნემსაძე, ჩიკვილაძე.

"მერანი”: I ტაიმი - შეროზია, კაკუშაძე, ჟვანია, იობაშვილი, სუხიაშვილი, ტორონჯაძე, დიდავა, ელგუჯა გრიგალაშვილი, მანწკავა, ამბროლაძე, ბოხუა; შეცვლაზე შევიდნენ - შენგელია, კიკალიშვილი, მელიავა, გეგეჭკორი, წოწორია, ფონიავა, მამედოვი, ჩალაძე.

ეს გუნდები თავიანთ მორიგ სპარინგსაც ერთმანეთში ითამაშებენ. მატჩი ისევ "მარაკანაზე”, 3 თებერვალს შედგება.