თურქული შეკრების მორიგი სპარინგ-მატჩი გამართა ფოთის "კოლხეთმა”. ზღვისპირელთა პრესატაშე გია ეჯიბიას თქმით, დავით მახარაძის შეგირდებმა, ბულგარეთის 16-გუნდიან უმაღლეს ლიგაში მე-9 ადგილზე მყოფ პერნიკის "მინიორთან” 3:5 წააგეს.
პირველი ტაიმი ”მეშახტეთა” (ასე ითარგმნება ბულგარულიდან ”მინიორი”)  დიდი უპირატესობით წარიმართა, რაც მეტოქემ ანგარიშშიც ასახა - 0:4. ქართველებმა, კერძოდ კი დათა ციცხვაიამ პირველი გოლი 59-ე წუთზე გაიტანეს. ამას ათიოდე წუთში კიდევ ერთი ბულგარული გოლი მოჰყვა და მას შემდეგ გოლი მხოლოდ ფოთელებს გაჰქონდათ - პავლე დათუნაიშვილმა 87-ზე, ილია პავლიაშვილმა კი 88-ზე შეძლო ანგარიშში სხვაობის შემცირება.
დავით მახარაძემ "კოლხეთი” ასეთი შემადგენლობით ათამაშა: ნადირაშვილი (მიქაბერიძე, 60), ცხვიტარია (ხატიაშვილი, 30), ლომაშვილი, ფოფხაძე (კილასონია, 60), გაბუნია (კაკულია, 56) გოგონაია (ცხადაია, 30), ქებაძე (დათუნაიშვილი, 30), გვალია (წაბრია, 67), სიჭინავა (ხუბუტია, 70), წურწუმია (ციცხვაია, 30), ტუღუში (პავლიაშვილი, 30).
ალანიაში ფოთელებს კიდევ 2 სპარინგი დარჩათ სათამაშო - 5 და 8 თებერვალს. პირველი მატჩის მეტოქე ჯერ კიდევ უცნობია, მეორეში კი დავით მახარაძის გაწვრთნილები ბულგარეთის მე-5 ადგილოსან სოფიას ”სლავიას” დაუპირისპირდებიან.

ფრიდონ კერვალიშვილი