დუშან უჰრინის სიტყვები ჩეხურმა Aktualne-მ გამოაქვეყნა. კერძოდ, 69 წლის მწვრთნელი ამბობს, თბილისის "დინამოდან” შემოთავაზება მომივიდაო. გეცოდინებათ, უჰრინი 2006-2008 წლებში მუშაობდა "დინამოს” თავკაცად და საქართველოს ყველაზე ტიტულოვანი კლუბიც ბოლოს სწორედ მის ხელში გახდა ქვეყნის ჩემპიონი.
უჰრინი: "კლუბს ახალი მფლობელი ჰყავს. "დინამოს” თითქოს "ბარსელონას” მოდელისკენ უნდა აეღო კურსი, ესპანელი მწვრთნელები და ფეხბურთელები მოიყვანეს კიდეც, მაგრამ შედეგი ისეთი ვერ იყო, რასაც მფლობელი ელოდა. მწვრთნელი გაუშვეს. ჩვენ დამატებით ინფორმაციას მოვიძიებთ და მერე გადავწყვეტთ”.
საინტერესოა... ბუნებრივია, "მსოფლიო სპორტმა” ინფორმაცია გადაამოწმა და "დინამოს” სპორტულ დირექტორ გიორგი ნემსაძეს დაუკავშირდა:
- ამის შესახებ არაფერი მსმენია. გამორიცხულია. დუშან უჰრინი კარგი ადამიანია და კარგი მწვრთნელიც გახლდათ, მაგრამ ეს ინფორმაცია პირველად მესმის.
- უცნაურია, მაგრამ თავად დუშან უჰრინი ამბობს, "დინამოსგან” წინადადება მომივიდაო...
- ვერაფერს გეტყვით. უჰრინი "დინამოში” რომ იყო, მაშინ შესთავაზეს კონტრაქტის გაგრძელება და უარი თქვა, ჯანმრთელობა ხელს არ მიწყობსო. ეს მაშინ და ახლა მით უმეტეს, წლები გავიდა.
- "დინამოში” რაიმე სიახლე ხომ არაა ფეხბურთელების წასვლა-მოსვლასთან დაკავშირებით?
- ჯერჯერობით, არა. გუნდი ვარჯიშობს და გიორგი დევდარიანიც აქტიურადაა ჩართული. შემადგენლობის დარეგულირება მისი პრეროგატივაა.

ილია ნანობაშვილი