თბილისის "დინამომ” ორი ახალწვეული ფეხბურთელის პრეზენტაცია მოაწყო. ეროვნული სტადიონის საპრესკონფერენციო დარბაზში ჟურნალისტებს კლუბის გენერალური დირექტორი ზურაბ პოლოლიკაშვილი, სპორტული დირექტორი გიორგი ნემსაძე, პრესატაშე გიგა გვენცაძე და ფეხბურთელები, 25 წლის გიორგი მერებაშვილი და 23 წლის ირაკლი ძარია წარუდგნენ.
მერებაშვილთანაც და ძარიასთანაც 1+2-წლიანი კონტრაქტები გაფორმდა. შეხსენება რად გინდათ, მერებაშვილი 2006-2010 წლებში გამოდიოდა "დინამოში” და გუნდის საუკეთესო მოთამაშეც გახლდათ, ბოლო ორი წელი კი სერბულ "ვოივოდინაში” გაატარა და იქაც წარმატებით ირჯებოდა.
რაც შეეხება ძარიას, ბოლო წლებში "ზესტაფონის” ერთ-ერთი წამყვანი ძალა გახლდათ, ნახევარდაცვის ცენტრში შეუცვლელი ფიგურა იყო. ძარია ფოთის "კოლხეთის” აღზრდილია, 2005 წელს "ზესტაფონში” გადავიდა და მხოლოდ ერთი სეზონით იყო სხვაგან განათხოვრებული (ცხინვალის "სპარტაკი” 2007-2008 წლებში).
მერებაშვილს 10 ნომერი გადაეცა, ძარიას – 88.
პოლოლიკაშვილი: "წელიწადი სიახლეებით დავიწყეთ. ჩვენ ყოველთვის ორიენტირებულნი ვიყავით გუნდის გაძლიერებაზე. გიორგი "დინამოს” ძველი მეგობარია, აქ არაერთი დასამახსოვრებელი მატჩი ჩაუტარებია და სერბეთშიც საუკეთესო ლეგიონერი გახდა. ირაკლი კი წამყვანი ძალა იყო "ზესტაფონში” და ახლა მის კარიერაში ახალი გუნდია "დინამოს” სახით. მჯერა, დიდ დახმარებას გაგვიწევს. ორივე ფეხბურთელს დიდ მადლობას ვუხდი: ბევრი შეთავაზება ჰქონდათ უცხოეთიდან, მაგრამ პატრიოტული მოტივი მაღლა დააყენეს”.
ნემსაძე: "როგორც დაგპირდით, გუნდი აუცილებლად გაძლიერდებოდა. უბრალოდ, მაშინ ჯერ არ იყო გადაწყვეტილი ამ ფეხბურთელების დამატების საკითხი და გვარებს ვერ ვაკონკრეტებდით. მინდა, გიორგის და ირაკლის წარმატება ვუსურვო "დინამოში”. მათ ჰქონდათ სხვა წინადადებებიც, მაგრამ "დინამო” არჩიეს”.
მერებაშვილი: "დიდი მადლობა "დინამოს” ხელმძრვანელობას ჩემდამი გამოცხადებული ნდობისთვის. ბედნიერი ვარ, რომ ისევ "დინამოში” აღმოვჩნდი. იმედი მაქვს და მჯერა, რომ გულშემატკივრებს იმედებს გავუმართლებ. საამისოდ ყველაფერს გავაკეთებ”.
ძარია: "მოხარული ვარ, რომ დღეს "დინამოსთან” გავაფორმე ხელშეკრულება. "დინამოში” თამაში ბავშვობის ოცნება იყო და ყველაფერს გავაკეთებ, რათა ამ გუნდში ღირსეულად წარმოვაჩინო თავი”.
"დინამოში” კიდევ იქნებიან ახალწვეულები და რა თქმა უნდა, კლუბის დატოვებაც არაერთ ფეხბურთელს მოუწევს. შემდეგ კითხვების დროც დადგა:
-    "დინამო” 4-3-3 ტაქტიკურ სქემას ეყრდნობა და მერებაშვილი რომელ პოზიციაზე მოიაზრება?
- ნემსაძე: ამაზე ჩვენ ვერ გაგცემთ პასუხს. ეს ალექს გარსიას პრეროგატივაა.
- რა ხდება გოგიტა გოგუას დამატების თაობაზე?
- ნემსაძე: გოგიტასთან ურთიერთობა გვაქვს და ვფიქრობ, უახლოეს მომავალში შეგვეძლება ამაზე პასუხის გაცემა.
- კიდევ რომელი ფეხბურთელების გადაბირებას ცდილობდით?
- პოლოლიკაშვილი: დავით თარგამაძის შეძენის დიდი სურვილი გვქონდა და ბევრს ვეცადეთ. თარგამაძე ძალიან კარგი ადამიანია და წარმატებას ვუსურვებთ. ასევე, სანდრო გურულის გადმოყვანა გვინდოდა.
- "დინამოს” აშკარად უჭირდა დაცვაში. ვის დამატებას აპირებთ ამ რგოლში?
- ნემსაძე: ამ ეტაპზე ვერაფერს გეტყვით. ისე, გუნდში აუცილებლად იქნბეა ჯანსაღი კონკურენცია.
- შეგიძლიათ იმ ფეხბურთელებზე გვითხრათ, რომლებიც კლუბს ტოვებენ?
- ნემსაძე: ბევრნი წავლენ იჯარით. "სპარტაკში” გავუშვით ჩაფიძე, გაბაშვილი და ნადირაძე, ხოლო "დილაში” ლექვთაძე, გველესიანი და კაშია.
- "დინამომ” ზაფხულში ესპანელი ფეხბურთელები დაიმატა. ამჯერად ქართველების გადმოყვანაზე აკეთებთ აქცენტს?
- პოლოლიკაშვილი: ეს ყოველთვის გვსურდა. ჩვენს ჩემპიონატში ნამდვილად არიან კარგი ფეხბურთელები. აუცილებლად ლეგიონერები უნდა დავიმატოთო, ასეთი მიდგომა არასოდეს გვქონია. ზაფხულში ვჩქარობდით, ევროპის ლიგის მატჩები მოახლოებული იყო და ფეხბურთელები სასწრაფოდ უნდა დაგვემატებინა. ჩვენს ინტერესებში ყოველთვის იქნება გამორჩეული ქართველი ფეხბურთელების დამატება.

შემდეგ დარბაზიდან "ეროვნულის” მინდორზე გავიდნენ მერებაშვილი და ძარია, ახალი მაისურები მოირგეს და ერთმანეთში პასები გააკეთეს – როგორც ევროპაში ხდება პრეზენტაციებისას.
და კიდევ, სავარაუდოდ, სამშაბათს 15 საათზე "ეროვნულის” საპრესკონფერენციო დარბაზში "დინამოს” მწვრთნელი ალექს გარსია ჟურნალისტებს შეხვდება.