ქუთაისის "ტორპედო” საღორიის საწვრთნელ ბაზაზე შეიკრიბა და ახალ წელს მშობლიურ ქალაქში პირველად ივარჯიშა. რიონისპირელთა კლუბის ოფიციალურ ვებგვერდზე გამოქვეყნდა გუნდის თავკაცის, გია გეგუჩაძის კომენტარი, რომელიც ქუთათურთა უახლოეს გეგმებს ეხება.
გია გეგუჩაძე ("ტორპედოს” მთავარი მწვრთნელი): "ახალი წლიდან სამდღიანი ციკლი თბილისში გვქონდა. სამედიცინო შემოწმებასთან პარალელურ რეჟიმში გუნდი ვარჯიშობდა. შეგვიძლია ვთქვათ, რომ მდგომარეობა ნორმალურია და ყველა ფეხბურთელი ჯანმრთელადაა. 9-დან 18 იანვრის ჩათვლით მზადება ქუთაისში გაგრძელდება. 21 იანვარს კი, შეკრების გასავლელად ანთალიაში გავემგზავრებით, სადაც მოვემზადებით და ძლიერ გუნდებთანაც ვითამაშებთ.
ვიდრე ანთალიაში წავალთ, ქუთაისში ყველანაირი ტიპის ვარჯიშებს გავმართავთ. რა თქმა უნდა, ვიზრუნებთ კონდიციების ამაღლებაზე, ამდენად, ფიზიკური დატვირთვები საკმაოდ იქნება, თუმცა ბურთზე უარს არ ვამბობთ. ასევე გვექნება ტაქტიკური და ტექნიკური ტიპის ვარჯიშებიც. ამასთან ერთად, ვგეგმავთ ორი ამხანაგური მატჩის გამართვას 15-სა და 18-ში, მეტოქეების ვინაობა გადაწყვეტილი ჯერჯერობით არ არის.
გუნდის შესავსებად მუდამ ძიებაში ვართ - ყოველთვის უკეთესი ფეხბურთელი გვინდა, მაგრამ რასაც ვუყურებ ამ ეტაპზე, ახალი ფეხბურთელების მოყვანის მხრივ ცუდად არ გვიმუშავია. შეიძლება, ბევრი გულშემატკივარი ელოდებოდა ხმაურიან ტრანსფერებს, მაგრამ ამ შემთხვევაში მიმაჩნია, რომ ჯერ ამ ფეხბურთელებით გავალთ ფონს. რაც შეეხება ახალწვეულებს, საკმაოდ კრეატიული ფეხბურთელები არიან, მოედანზე კარგად აზროვნებენ და ფეხბურთი იციან".