თბილისის ”დინამოდან” დამატებული სამი ფეხბურთელის (მეკარე გიორგი ნადირაძე, შემტევი ნახევარმცველი ლაშა ჩაფიძე და თავდამსხმელი კონსტანტინე გაბაშვილი) გარდა ცხინვალის ”სპარტაკთან” კიდევ სამმა ახალწვეულმა გააფორმა კონტრაქტი. გადაწყვეტილი ამბავია, თავდამსხმელი ლევან მელქაძე, შემტევი ნახევარმცველი მიხეილ ჯიშკარიანი და მცველი ლევან ჭაფოძე უკვე სპარტაკელები არიან.

ლევან მელქაძე

32 წლის ლევან მელქაძე, რომელსაც საქართველოს ეროვნული ნაკრების რიგებში 5 მატჩში აქვს ნათამაშები, სხვადასხვა დროს თბილისის ”დინამოში”, ”ვიტ ჯორჯიაში”, იტალიურ ”სიენაში” ნორვეგიულ ”ვალერენგაში”, ყაზახურ ყარაგანდის ”შახტარში”, ”ზესტაფონსა” და ბოლნისის ”სიონში” ირიცხებოდა. ლევან მელქაძე ერთ-ერთი ის ფეხბურთელია, რომელმაც თბილისის ”დინამოს” შემადგენლობაში უეფას თასის ჯგუფურ რაუნდში იასპარეზა... ბოლოს, ტრავმის გამო, ლევანს საკმაო პერიოდი გაუცდა, თუმცა ორ კვირაზე მეტია, რაც ჩვენს გუნდში ვარჯიშობს და ”სპარტაკისთვის სარგებლის მოტანა რომ შეუძლია, საამისოდ განაცხადის გაკეთება უკვე მოასწრო. ”ბენდელას თასის” გათამაშებისა და ამხანაგურ მატჩებში მელქაძემ 4 ბურთი გაიტანა (1 პენალტების სერიაში) და სამი საგოლე გადაცემა გააკეთა. ლევან მელქაძემ ”სპარტაკთან” 1.5-წლიანი (6 თვე პლუს 1 წელი) კონტრაქტი გააფორმა.

ლევან ჭაფოძე

”სპარტაკის” კიდევ ორი ახალწვეული სპარტაკისთვის უცხო ნამდვილად არ არის. 23 წლის ლევან ჭაფოძემ გასული, 2010-11 წლების სეზონი ”სპარტაკში” ჩაატარა და გუნდიდან ერთადერთი ფეხბურთელი იყო, რომელმაც ჩემპიონატის ყველა კალენდარულ შხვედრაში ითამაშა. ჭაფოძემ მიმდინარე სეზონი მარტვილის ”მერანში” დაიწყო, მაგრამ იქ საქმე არ აეწყო და ისევ ჩვენს გუნდს დაუბრუნდა. ლევან ჭაფოძემ ”სპარტაკთან” ერთწლიანი კონტრაქტი გააფორმა.

მიხეილ ჯიშკარიანი

 ასევე ერთწლიანი კონტრაქტი გააფორმა ”სპარტაკთან” 19 წლის მიხეილ ჯიშკარიანმა-უმცროსმა. მანაც გასული სეზონი ”სპარტაკში” ჩაატარა, მიმდინარე სეზონი თბილისის ”დინამოს” დუბლებში დაიწყო და ისევ ცხინვალის ”სპარტაკს” დაუბრუნდა.

http://fcspartak.ge