გამოკითხვაში - „ჩემპიონატის გასულ ნახევარში რომელი შეხვედრა იყო ქუთაისის „ტორპედოსთვის" ყველაზე გამორჩეული? - მონაწილეობა 517-მა რესპოდენტმა მიიღო. გულშემატკივართა ყველაზე მეტმა 54.06%-მა (279 ხმა) ჩვენი გუნდის მიერ ჩატარებული მატჩებიდან არჩევანი „ტორპედო" - „დინამოს" ქუთაისურ დაპირისპირებაზე გააკეთა.

    შეგახსენებთ, გიორგი სუხიაშვილის დამოძღვრილი მასპინძლები აღნიშნულ შეხვედრაში 13-გზის ჩემპიონთან თამაშის საწყის ათ წუთში, გრიგოლ დოლიძის და უკვე ყოფილი ტორპედოელი გიორგი მეგრელაძის გოლების წყალობით ორბურთიანი სხვაობით გავიდნენ წინ. პირველი ტაიმის ბოლოს, სტუმრებმა სხვაობა მინიმუმამდე ალბერტ იაგუეს შედეგიანი დარტყმით შეამცირეს, თუმცა „დინამოს" თამაშის გადასარჩენად ეს გოლი არ ეყო და „ტორპედოს" ათმატჩიანმა წაუგებელმა სერიამ, ამ შეხვედრიდან აიღო სათავე.

   გამოკითხვაში მეორე ადგილზე, ხმების გამოკვეთილი რაოდენობით ზესტაფონში გამართული იმერული დერბი გავიდა, რომელშიც „ტორპედომ" ეროვნული ჩემპიონატის მე-12 ტურში მოქმედი ჩემპიონი დავით დიღმელაშვილის ერთადერთი გოლით დაამარცხა. ეს მატჩი გამორჩეულად გამოკითხულთა 34.81-მა პროცენტმა (180 ხმა) მიიჩნია.

ტორპედოელთა გვარებზე დაკლიკებით იხილეთ მატჩში გატანილი გოლების ვიდეოჩანაწერი.

   ვინაიდან, გულშემატკივრებმა ძირითადად მხოლოდ ზემოთ ხსენებული ორი თამაში გამოარჩიეს, სხვა გაცემული პასუხების პროცენტული მაჩვენებელი კი ძალზედ მცირე გახლდათ, ამიტომ მიზანშეწონილად არ ჩავთვლით თოთოეული მათგანის დაფიქსირებას.

   ვის თვლით ჩემპიონატის გასულ ნახევარში „ტორპედოს" საუკეთესო ფეხბურთელად? - დღეიდან საიტზე ასეთი შინაარსის გამოკითხვა დავიწყეთ.