უცხოურ შეკრებაზე წაუსვლელმა უმაღლესი ლიგის გუნდებმა ერთმანეთში მორიგი ამხანაგური მატჩი გამართეს. თბილისში, საბურთალოს საფეხბურთოს სკოლის ხელოვნურსაფარიან მოედანზე, ერთმანეთს ბოლნისის "სიონი” და მარტვილის "მერანი” დაუპირისპირდნენ. ამ გუნდების წინა შეხვედრის მსგავსად, გამარჯვება მარტვილელებს დარჩათ - 2:1.
ქვემოქართლელთა პრესატაშეს ჯემალ ჭიპაშვილის თქმით, ანგარიში მე-16 წუთზე, ბოლნისელმა ჯაბა უგულავამ გახსნა. მან მარცხენა ფლანგიდან თენგიზ ჩიკვილაძის მიერ გაკეთებული გასწვრივი გადაცემა დააბოლოვა შედეგიანად. 31-ე წუთზე, სწრაფი კონტრშეტევის შედეგად, მამედოვმა გაათანაბრა.
შესვენებაზე "მერანის” თავკაცმა მალხაზ ჟვანიამ პირველი ტაიმის შემადგენლობიდან მხოლოდ გივი დიდავა დატოვა შეუცვლელი, მისი ოპონენტი ხვიჩა ქასრაშვილი კი, მხოლოდ 4 შეცვლით დაკმაყოფილდა. 76-ე წუთზე, ელგუჯა გრიგალაშვილის მიერ განხორციელებულ სოლორეიდს, რომლის დროსაც იგი ხუთ ბოლნისელს გასცდა, "სიონის” კარში 11-მეტრიანის დანიშვნა მოჰყვა - მარტვილელთა ნახევარმცველი კობაურმა წააქცია. პენალტის დარტყმა გიგა ჟვანიამ იკისრა - 2:1.
გაგაცნობთ მეტოქე გუნდების შემადგენლობებს.
"სიონი”: I ტაიმი - ბობღიაშვილი, კობაური, სვანიძე, ჩიკვილაძე, ქემოკლიძე, ჭანკოტაძე, გაბრიჭიძე, კაციტაძე, ოლეგ გველესიანი, უგულავა, მეტრეველი; შეცვლაზე შევიდნენ - გიორგი ოქროპირიძე, ლევან ჩხეტიანი, ხიდაშელი, საბა ლომია.
"მერანი”: I ტაიმი - შენგელია, კიკალიშვილი, მელიავა, გეგეჭკორი, მჭედლიშვილი, დიდავა, ფონიავა, მამედოვი, ჩალაძე, ამბროლაძე, ტაპე; შეცვლაზე შევიდნენ - შეროზია, კაკუშაძე, გიგა ჟვანია, იობაშვილი, სუხიაშვილი, მანწკავა, ელგუჯა გრიგალაშვილი, ტორაძე, ბოხუა, ტორონჯაძე.
როგორც ხედავთ, "მერანის” რიგებს კოტდივუარელი მუნინი ტაპე დაუბრუნდა. როგორც მარტვილელთა თავკაცმა მალხაზ ჟვანიამ გვითხრა, ტაპემ ოჯახური პრობლემები მოაგვარა და კვლავ გუნდის განკარგულებაშია. "მერანის” უახლოეს გეგმებს რაც შეეხება, გუნდმა შუასასეზონო მზადების თბილისური ეტაპი უკვე დაასრულა და იგი დასავლეთ საქართველოში დაბრუნდება, სადაც სეზონის განახლებამდე კიდევ 2 საკონტროლო მატჩი აქვს დაგეგმილი. მარტვილელები 7 თებერვალს, ურეკში შეკრებაზე მყოფ სომხეთის ჩემპიონ ერევნის "ულისესს” დაუპირისპირდებიან, 10-ში კი, ქუთაისის "ტორპედოს” მისსავე საწვრთნელ ბაზაზე გაეჯიბრებიან.
7 თებერვლამდე გრძელდება ბოლნისელთა მზადების თბილისური ეტაპი. გუნდი სასტუმრო "ბატესტაშია” დაბინავებული. კლუბის წარმომადგენლის თქმით, შეკრების დასრულებამდე "სიონს” გეგმაში კიდევ ერთი სპარინგის გამართვა აქვს დაგეგმილი. დიდი ალბათობით, ქვემოქართლელთა მეტოქე ცხინვალის "სპარტაკი” იქნება.