მამუკა ჯუღელის სახელი ყველა ქართველმა გულშემატკივარმა იცის. მასზე ლეგენდები დადის, მის სახელს უამრავი სკანდალი უკავშირდება. საქართველოს ნაკრების მეკარე ნუკრი რევიშვილი ამბობს, რომ ამ კაცმა მამობა გაუწია და წარმატებას მას უმადლის. ბევრი კი, ჯუღელს არაკეთილსინდისიერებაში და ფეხბურთელების საკუთარი მიზნებისთვის გამოყენებაში ადანაშაულებს.

ცნობილმა რუსმა ჟურნალისტმა ვასილ უტკინმა ერთხელ ირონიულად განაცხადა, რომ ჯუღელი რუსული ფეხბურთის ჟოზე მოურინიუა.
მამუკა ჯუღელი ზესტაფონში დაიბადა და საფეხბურთო კარიერა საქართველოში დაიწყო. გამოდიოდა ფოთის ”კოლხეთის”, ზესტაფონის ”მარგვეთის” და ქუთაისის ”ტორპედოს” რიგებში. მერე უკრაინას მიაშურა და "ტავრიაში” და ”ზორიაში” აგორებდა ბურთს. იქედან ლატვიურ ”დაუგვაში ” გადაინაცვლა. კარიერის დასრულების შემდეგ, საფეხბურთო აგენტი გახდა და მალე მოერგო რუსულ საფეხბურთო წრეებს.

ბევრისთვის მამუკა ჯუღელი მხოლოდ კარიკატურული ფიგურაა, უგემოვნო ჩაცმის სტილით და პროვინციული მეტყველებით. სხვებისთვის კი, პატივსაცემი, გავლენიანი პერსონა. ჯუღელის მოქმედების მთავარი არეალი რუსეთის ქვედა ლიგაა. პირველი დივიზიონის რუხი კარდინალის სახელს უამრავი გუნდი და უფრო მეტი საეჭვო თამაში უკავშირდება.

ახლახანს გავრცელდა ინფორმაცია, რომ ჯუღელი საქართველოში ბრუნდება და გორის ”დილას” ენერალური დირექტორი გახდება. მან გორში უკვე ჩამოიყვნა მისი ერთ-ერთი ”შვილობილი” გოჩა ხოჯავა.( ჯუღელმა თქვას და მისი ბიჭები ჯანდაბაშიც გაჰყვებიან თუ საჭიროა…) მოკლედ, გორში ახალი ეტაპი დაიწყო…მოგეხსენებათ, კლუბს შინაგან საქმეთა სამინისტრო აფინასებს.გენერალური დირექტორი ყველასათვის ამოუცნობი და ლეგენდარული ჯუღელია. როგორც კულუარებში საუბრობენ, ზესტაფონელ რუხ კარდინალს დაუქადნია, გორის ”დილას” ევროპის საკლუბო ტურნირებზე გავიყვანო…