სპანეთში შეკრებაზე მყოფი თბილისის "დინამო” ამხანაგურ მატჩში ჩინურ "გუანჩჟოუსთან” დამარცხდა, ანგარიშით 0:3. ქართველ გულშემატკივრებს აღნიშნული შეხვედრის პირდაპირ ეთერში ხილვა ინტერნეტის საშუალებით ჰქონდა შესაძლებელი. მარცხზე მეტად ქომაგთა ყურადღება ალექსანდრე კოშკაძემ მიიქცია, რომლის უცენზურო სიტყვებიც მატჩის მიმდინარეობის დროს თავისუფლად ისმოდა, რასაც გულშემატკივრების აღშფოთება მოჰყვა.

აღნიშნულთან დაკავშირებით კომენტარი "დინამოს” საზოგადოებასთან ურთიერთობის განყოფილების უფროსმა ლაშა დვალიშვილმა გააკეთა.

"არანაირ გამართლებას არ ვეძებ და არც არავის ადვოკატობას ვაპირებ. ფეხბურთში უარესებიც მომხდარა, თუმცა ეს არის "დინამო” და "დინამო” არ არის ერთი ჩვეულებრივი გუნდი. ამით მინდა ვთქვა, რომ დღეს რაც ხდება გუნდში, ეს ყველაფერი წარსულში დარჩება,  გულშემატკივარი კი მიიღებს იმ "დინამოს”, რასაც ელის. რაც შეეხება ამ ფაქტს, მესმის ეს ყველაფერი, თუმცა მგონია, რომ თემას გაზვიადებული რეზონანსი მოჰყვა. "დინამოს” აკადემიის ბავშვებისთვის მინდა ვთქვა, რომ მათთვის გუნდში მოხვედრა უნდა იყოს სამაგალითო. აქედან გამომდინარე, კლუბში მომუშავე ადამიანებმა უნდა გაითავისონ, სად მუშაობენ, სად თამაშობს, რა მაისური აცვიათ, რა ისტორიისა და ტრადიციების მატარებელი გუნდის ღირსებას იცავენ. გუნდის ხელმძღვანელობა თემას განიხილავს და ფაქტს კლუბის მხრიდან შესაბამისი რეაგირებაც მოჰყვება”, – აღნიშნა ლაშა დვალიშვილმა.