23-ე ეროვნული ჩემპიონატის საგაზაფხულო ეტაპისთვის მზადებას ფოთის "კოლხეთიც” შეუდგა. დავით მახარაძის გაწვრთნილი ზღვისპირელები "ფაზისის” მიმდებარედ არსებულ მოედანზე კვირას შეიკრიბნენ და ივარჯიშეს. როგორც "მსოფლიო სპორტს” კლუბის პრესატაშე გია ეჯიბიამ შეატყობინა, გუნდი 20 იანვრამდე ადგილზე მოემზადება, მერე კი 12-დღიან შეკრებას გაივლის. სად შედგება ეს შეკრება, ამის თაობაზე ჯერ კიდევ მიდის მუშაობა.
"კოლხეთში” რამდენიმე თვალშისაცემი ცვლილება მოხდა. გუნდი დატოვეს და ალბათ გორის "დილაში” გააგრძელებენ კარიერას ლექსო ინწკირველი (მიმდინარე სეზონის 17 მატჩში 1 გოლი), ლევან მდივნიშვილი (17 მატჩი) და დავით მეგრელიშვილი (6 მატჩი, 1 გოლი). ბოლოხანს ფოთელთა ძირითად კიპერად მოთამაშე მინდია ბობღიაშვილი (9 მატჩში 10 გაშვებული გოლი) ბოლნისის "სიონს” დაუბრუნდა, ხოლო ქუთაისის "ტორპედოსთან” 5-წლიანი კონტრაქტი გააფორმა გიორგი ლემონჯავამ (13 მატჩი). რაც შეეხება ფოთელთაგან წასულ ლევან შავგულიძესა (17 მატჩი) და ლევან თედიაშვილს (1 მატჩი), მათ სამომავლო პერსპექტივაზე ჯერ არაფერია ცნობილი.
ჯერ ცნობილია "კოლხეთის” ორი ახალწვეულის თაობაზე. ფოთელთა რიგებში ითამაშებს ცხინვალის "სპარტაკის” მიერ ტრანსფერზე დაყენებული კამერუნელი მცველი ფრიდოლინ ბოიომო. ზუგდიდის "ბაიადან” იჯარის წესითაა დამატებული ლევან წურწუმია.
შეგახსენებთ, რომ ეროვნული ჩემპიონატის რეგულარული ნაწილის დამთავრებამდე 4 ტურით ადრე, "კოლხეთს” 18 ქულა აქვს და ბოლოსწინა ადგილზეა. ზღვისპირელთა უახლოეს მიზნად, საუკეთესო 8 გუნდს შორის მოხვედრა ითვლება. ამჟამად კი, "სამშვიდობოს” მყოფ უახლოეს "გაგრას” ფოთელებზე 3 ქულით მეტი აქვს დაგროვილი.