თბილისის დროით 18.00 საათზე, სასტუმროსთან მდებარე მინდორზე ერთმანეთის პირისპირ გაგრასა და ყარაღანდის შახტიორის ძირითადი გუნდები წარსდგნენ.
შეხვედრა ყარაღანდელებმა 1:0 მოიგეს. ეს ერთადერთი გოლი შეხვედრის 63-ე წუთზე ბაროვსკიმ კუთხურიდან ჩაახვია და ისე გაიტანა.
მანამდე კი პირველ ტაიმში სეთურიძე ურტყამდა შორი მანძილიდან ძალიან სახიფათოდ, მეკარემ ზედ ცხვირწინ მოიგერია, კვანტალიანმა დაამატა, მაგრამ მეკარემ ჩინებული რეაქცია გამოავლინა და ბურთი კუთხურზე მოიგერია. პირველ ტაიმში სხვა რაიმე აღსანიშნავი არ მომხდარა. ძირითადად ბურთი მოედნის ცენტრშინ მიდიოდა, ორივე გუნდი განსაკუთრებული ყურადღებით თამაშობდა დაცვაში.
მეორე ტაიმში კი მეტოქემ ძალიან სახიფათოდ შემოგვიტია. ჯერ იყო და როჯერმა ცარიელ კარში ვერ გაიტანა ბურთი, ძელს გაარტყა, რომელიც ბეგაშვილმა კარის ხაზზე დაიჭირა და ყარაღანდელები მსაჯისგან გოლის ჩათვლას ითხოვდნენ. შემდეგ გოლიც გაგვიტანეს, ხოლო ამის შემდეგ უკვე ერთ-ერთი მეტოქე ბეგაშვილთან პირისპირ გადიოდა, მაგრამ ჩვენმა მეკარემ მოახერხა ბურთის მოგერიება.
საგოლე მომენტი გაგრასაც ჰქონდა, როდესაც ხუციძე გავიდა დასარტყმელ პოზიციაზე, ხელს არავინ უშლიდა, კარს ააცილა.
შემდეგ შეხვედრას ჩვენი გუნდი 6 თებერვალს ამავე მინდორზე პოლონეთის პირველი ლიგის კლუბ ბიტოვთან გამართავს, ხოლო 7 თებერვალს დილით შინ გამოემგზავრება.
3 თებერვალი. სიდე.
გაგრა – შახტიორი (ყარაღანდა, ყაზახეთი) 0:1
გოლი: ბაროვსკი 63
გაგრა: ბეგაშვილი, ხუციძე, კალანდაძე, ტყეშელაშვილი, ჯგერენაია, სეთურიძე, ხოჯაშვილი, ზვიადაძე, ნიკოლოზ ჯიშკარიანი, ჭკუასელი, კვანტალიანი.
შეცვლაზე შევიდნენ: ყურულაშვილი, ფალავანდიშვილი, სარდალიშვილი, ყიფიანი, როსტიაშვილი