თავდაპირველად, საღამოზე მყოფ საზოგადოებას ჩვენი გუნდის პრეზიდენტმა, ბატონმა ლევან ფხაკაძემ მიმართა სიტყვით, იქ მყოფთ გასული და დამდეგი დღესასწაულები მიულოცა და შემდეგი განაცხადა:

   "ქუთაისის „ტორპედოს" ევროპული ყაიდის კლუბად ჩამოყალიბების პროცესი წარმატებით მიმდინარეობს, ამაზე მეტყველებს ის, რომ კლუბის წარმატება „ვისოლის" გარდა სხვა მსხვილმა კომპანიებმაც ირწმუნეს და მისი სპონსორები გახდნენ. მათი რიცხვი უახლოეს მომავალში კიდევ უფრო გაიზრდება, არსებულ კომპანიებს, „ქარავანი" და „საქკაბელიც" დაემატებათ.

   კლუბს საქართველოში #1 მწვრთნელი ხელმძღვანელობს და ის შედეგი, რომელიც დღეს ეროვნულ ჩემპიონატზე გვაქვს, მის სწორ ტაქტიკაზე მეტყველებს. კლუბს იდეალური სავარჯიშო პირობები აქვს, გუნდის ახალი შემადგენლობა კი დასახული გაგმების მიღწევაში დაგვეხმარება. მინდა, ასევე, კლუბის წარმატებაში ვეტერანი ფეხბურთელების: სევასტი თოდუასა და გიორგი მეგრელაძის წვლილი აღვნიშნო და მადლობა გადავუხადო მათ თავდადებისთვის”.

   ბატონმა ლევანმა ამის შემდეგ სიტყვა გია გეგუჩაძეს გადასცა, რომელმაც ვეტერან ფეხბურთელებს, ასევე, მადლობა გადაუხადა და აღნიშნა, მათი დამსახურებაცაა ის, რომ გუნდი ამჟამად ეროვნული საფეხბურთო ჩემპიონატის მეორე ადგილზეა. „ტორპედოს" თავკაცმა ახალწვეულები წარადგინა, წარმატებები უსურვა თითოეულ მათგანს და სხვადასხვანომრიანი მაისურები საზეიმო ვითარებაში გადასცა.

   საღამოზე მოწვეულ სტუმრებს შორის იყვნენ: "ტორპედოს" ვეტერანი და მოქმედი ფეხბურთელები, ხელმძღვანელები, გულშემატკივრები, პრესის, მედიისა და ქალაქის მთავრობის წარმომადგენლები.

    „ტორპედო" არ არის ქუთაისისთვის მხოლოდ საფეხბურთო კლუბი, ის არის ქალაქის ღირსება" - განაცხადა ტრიბუნაზე სიტყვით გამოსულმა ქუთაისის მერმა ბატონმა გია თევდორაძემ.

   ღონისძიება თბილ გარემოში მოწყობილი ალაფურშეტით დასრულდა.