მიმდინარე სეზონის მეორე ეტაპისთვის მზადება ცხინვალის ”სპარტაკმა” 4 იანვარს თბილისში დაიწყო. ტრანსფერზე დაყენებული ცხრა ფეხბურთელისა და გათავისუფლებული ორი მოთამაშის სანაცვლოდ, ვლადიმერ ხაჩიძის გუნდმა თბილისის ”დინამოდან” 4 ფეხბურთელი დაიმატა (მეკარე გიორგი ნადირაძე, ნახევარმცველები – ლაშა ჩაფიძე და მიხეილ ჯიშკარიანი, თავდამსხმელი კონსტანტინე გაბაშვილი). გარდა ამისა, ”სპარტაკში” 5 ახალი ფეხბურთელი ვარჯიშობს და გუნდში მათი დარჩენა-არდარჩენის საკითხი იანვრის ბოლომდე გადაწყდება.
სპარტაკელთა ახალი კვინტეტი უკვე გაგაცანით და კიდევ შეგახსენებთ: მცველები – სერგი ორბელაძე, ლევან ჭაფოძე, თორნიკე ლოლაძე, ნახევარმცველი გიორგი გველესიანი და თავდამსხმელი გურამ მიქაძე.
ვლადიმერ ხაჩიძის გუნდი მომზადების მომდევნო ეტაპს შავიზღვისპირეთში გაივლის. ”სპარტაკი” 18 იანვარს დილით ურეკში გაემგზავრება და იქ 28 იანვრის ჩათვლით მოემზადება. ცხინვალელთა გუნდის თავკაცმა ურეკის შკრებისთვის 21 ფეხბურთელი შეარჩია.
მეკარეები: ლაშა ძაგანია, გიორგი ნადირაძე;
მცველები: დავით ლომაია, სერგი ორბელაძე, ლევან ჭაფოძე, ბადრი ტეტუნაშვილი, ნიკოლოზ მაისურაძე, მიხეილ მერეჩკო, უჩა ბურძენაძე;
ნახევარმცველები: თეიმურაზ შონია, ვალერი კილასონია, ირაკლი სამხარაძე, ლაშა ჩაფიძე, გიორგი მამუჩიშვილი, მიხეილ ჯიშკარიანი, თორნიკე თუხარელი, გიორგი გველესიანი;
თავდამსხმელები: თეიმურაზ შარაშენიძე, კონსტანტინე გაბაშვილი, დავით გელაშვილი, ილია ბუზალაძე,
”სპარტაკის” მთავარი გუნდის მწვრთნელთა გადაწყვეტილებით, მცველები ზვიად ლობჟანიძე და თორნიკე ლოლაძე, ასევე, თავდამსხმელი გურამ მიქაძე თბილისში დარჩებიან და დუბლშემადგენლობასთან ერთად გააგრძელებენ მზადებას. დუბლებში ვარჯიშობს მცველი გელა ხუბუაც.
ურეკში გამგზავრებამდე ”სპარტაკი” ”გაგრას” შერეულ კრებულს ამხანაგურ შეხვედრაში ორი შემადგენლობით გაეჯიბრა. ცხინვალელებმა პირველი ტაიმი ე.წ. მეორე შემადგენლობით ჩაატარეს და 1:2 დამარცხდნენ. გაგრელთაგან გიორგი ზვიადაძემ მე-2 წუთზე პენალტით გახსნა ანგარიში, მე-17 წუთზე ბაგაშვილმა სხვაობა ორამდე გაზარდა, მე-40 წუთზე კი უჩა ბურძენაძემ 1:2 დააფიქსირა. შესვენების შემდეგ სპარტაკელებმა ძირითადი შემადგენლობის ფეხბურთელები ჩართეს საქმეში, მაგრამ მეორე ნახევარი უგოლოდ დასრულდა.
ურეკის შეკრებაზე სპარტაკელები სამ ამხანაგურ მატჩს ჩაატარებენ. უკვე გადაწყვეტილია, რომ 22 იანვარს ცხინვალელები მარტვილის ”მერანს” გაეჯიბრებიან, 27-ში კი ლანჩხუთის ”გურიას” დაუპირისპირდებიან. ხაჩიძის გუნდი 24 იანვარსაც გამართავს საკონტროლო შეხვედრას, მეტოქედ კი ოზურგეთის ”მერცხალი” ან ფოთის ”კოლხეთი” ეყოლება.

ს. კ. ცხინვალის ”სპარტაკის” პრეს-სამსახური