ესპანურ შეკრებაზე მყოფმა საფეხბურთო კლუბმა ”ზესტაფონმა” მეორე საკონტროლო მატჩი გამართა და ამჯერადაც გამანადგურებელი მარცხი იწვნია. შეგახსენებთ, რომ გიორგი ჭიაბრიშვილის შეგირდებმა პირველი შეხვედრა უკრაინულ ”დნიპროსთან” 2:8 წააგეს, გუშინ კი ”მარბელიას თასის” გათამაშებაში ჩაებნენ და ყაზანის ”რუბინთან” 1:5 დამარცხდნენ.
რუსეთის ერთ-ერთ საუკეთესო გუნდთან შედარებით ტოლსწორად თამაში ზესტაფონელებმა მხოლოდ პირველ ტაიმში მოახერხეს. ყაზანელები მე-19 წუთზე დაწინაურდნენ, ქართულმა კლუბმა კი წონასწორობა შვიდ წუთში აღადგინა. თავის გამოჩენა შოთა გრიგალაშვილმა მოახერხა.
აღსანიშნავია, რომ მე-2 ტაიმში ”რუბინის” თავკაცმა ყურბან ბერდიევმა მეკარის გარდა ყველა ფეხბურთელი შეცვალა (მინდორზე ქართველი სოლომონ კვირკველიაც გამოჩნდა) და სასურველი შედეგიც მიიღო. ყაზანელებმა ”ზესტაფონის” კარი კიდევ ოთხჯერ დალაშქრეს და საქართველოს ჩემპიონს კიდევ ერთი სამარცხვინო მარცხი აგემეს.
გასულ შეხვედრაში ზესტაფონელთა შემადგენლობა ასეთი გახლდათ: მამალაძე (კაპ.), ღონღაძე, ონიანი, საჯაია (კობახიძე, 73), ელიავა, გორგიაშვილი (ბენაშვილი, 80), ბაბუნაშვილი (რაჟამაშვილი, 64), აფციაური, გრიგალაშვილი, მუჯირი (წინამძღვრიშვილი, 60), დვალი.

ზესტაფონელები ”მარბელიას თასზე” მორიგ მატჩს 6 თებერვალს ჩაატარებენ. ჭიაბრიშვილის გუნდის მეტოქე რუმინული "ტიმიშოარა” იქნება, რომელიც პირველ შეხვედრაში პოლონურ "ლეხთან” 0:5 განადგურდა.