2011 წლის 23 დეკემბერს, საფეხბურთო კლუბმა „ზესტაფონმა" ფიფაში საგანგებო წერილი გააგზავნა, სადაც მსოფლიო ფეხბურთის მმართველი ორგანოს იურიდიულ კომიტეტს თხოვნით მიმართა, განეხილათ სფფ-ის მიერ დაარსებული საფეხბურთო საარბიტრაჟო სასამართლოს საქმიანობის კანონიერება და ლეგალურობა.

წერილში დაფიქსირებული იყო კლუბის პოზიცია, სადაც ისინი უნდობლობას უცხადებდნენ საფეხბურთო არბიტრაჟს და მისი წევრების კომპეტენციაშიც შეჰქონდათ ეჭვი. ამასთან, კლუბმა განმარტა, რომ თავის დროზე კი მოაწერეს ხელი არბიტრაჟის შექმნის გადაწყვეტილებას, მაგრამ მხარს არ უჭერენ იმ სახით არსებობას, რა სახითაც შეიქმნა და არსებობს.

ფიფადან საპასუხო წერილი სფფ-ში და სკ „ზესტაფონში" ოპერატიულად მოვიდა. ფიფამ, ერთის მხრივ კლუბს გასცა პასუხი და მეორეს მხრივ, საქართველოს ფეხბურთის ფედერაციაც ჩააყენა საქმის კურსში.

საფეხბურთო კლუბს მიეცა მითითება, რომ ეს საკითხი არ არის ფიფას კომპეტენციაში შემავალი თემა და შიდასაფეხბურთო დავები უნდა გადაწყდეს სფფ-ის წესდების შესაბამის უწყებაში (ამ შემთხვევაში, საფეხბურთო საარბიტრაჟო სასამართლოში).

წერილში ხაზგასმითაა მითითებული, რომ საქართველოს ფეხბურთის ფედერაციაში შემავალი ყველა სუბიექტი უნდა დაემორჩილოს სფფ-ის გადაწყვეტილებებს, მის წესდებასა და დებულებებს.

აქვე, შეგიძლიათ იხილოთ წერილის ელექტრონული ვერსიაც.

სფფ-ის პრესსამსახური