მორიგი ახალწვეული, ვისთანაც ქვეყნის მოქმედმა ჩემპიონმა ს/კ "ზესტაფონმა” კონტრაქტი გააფორმა, 27 წლის გოგა ბერაია გახლავთ. იმერულ კლუბსა და ფეხბურთელს შორის კონტრაქტი 1+2 წლის პრინციპით გაფორმდა.
ბერაია ამპლუით საყრდენი ნახევარმცველია და მისი პირველი ქართული გუნდი, რომლის მაისურიც ეროვნულ ჩემპიონატში ერთადერთხელ მოირგო, თბილისის "დინამოა”. უფრო მეტჯერ ენდო მას ალექს გარსია შარშან ზაფხულში გამართულ ევროპის ლიგის შესარჩევ ეტაპზე - 3 მატჩში.
რაც შეეხება ბერაიას "წინაეროვნულ” კარიერას, ის 1996 წელს რუსეთში, სტავროპოლის "დინამოში” დაიწყო, სადაც გოგა 2001 წლამდე თამაშობდა. შემდეგ იყო კრასნოდარის "ბიოლოგი” (2001-2003), ისევ სტავროპოლის "დინამო” (2003-2005) და ბოლოს კარიერის აზერბაიჯანული პერიოდი - "ქიაფაზი” (2005-2006), "ყარაბაღი” (2007-2008), "გაბალა” (2009-2011). გოგას და მის ტყუპისცალ ირაკლის, თავის დროზე აზერბაიჯანის ახალგაზრდულ ნაკრებშიც აქვთ ნათამაშები.

გოგა ბერაია - ნახევარმცველი; დაბადებულია - 26.01.1984; სიმაღლე - 174 სმ, წონა - 71 კგ.

საფეხბურთო კლუბ ”ზესტაფონთან” კონტრაქტის გაფორმებამდე ასპარეზობდა შემდეგ საფეხბურთო კლუბებში: "დინამო" (სტავროპოლი, რუსეთი) - 1999-2001, 2003-2005; "ბიოლოგი" (კრასნოდარი, რუსეთი) - 2001-2003; "ქიაფაზი" (განჯა, აზერბაიჯანი) - 2005-2006; "ყარაბახი" (აგდამი, აზერბაიჯანი) - 2006-2008; "გაბალა" (გაბალა, აზერბაიჯანი) - 2009-2011; "დინამო" (თბილისი) - 2011.