რამდენიმე დღის წინ მარტვილის "მერანი" ამხანაგურად ერევნის "ულისს" შეხვდა, რის შემდეგაც სომხურმა კლუბმა "მერანის" გამოცდილი ნახევარმცველის, გიორგი მანწკავას მიმართ დაინტერესება გამოთქვა.

30 წლის მანწკავა უკვე შეუერთდა "ულისს", სადაც ცოტა ხნით კიდევ დააკვირდებიან და დიდი ალბათობით, კონტრაქტსაც გაუფორმებენ. ყველაფერი რამდენიმე დღეში გაირკვევა.

მანწკავას "მერანთან" მოქმედი კონტრაქტი აკავშირებს და თუ სომხეთში გადავიდა, მარტვილელებს კომპენსაცია ეკუთვნით.ამრიგად, წლეულს სომხურ კლუბში ოთხი ქართველი ფეხბურთელი ითამაშებს. მანწკავას და კრასოვსკის გარდა, "ულისესის” ღირსებას თენგიზ უგრეხელიძე და შოთა ჯიქია დაიცავენ, რომლებიც ერევნელთა შორის შარშანაც ასპარეზობდნენ.

მანწკავა მიმდინარე სეზონს წარმატებით ატარებს. ეროვნული ჩემპიონატის პირველ ნახევარში მან 17 მატჩი ჩაატარა და 6 გოლი გაიტანა, რაც არათუ მისი ამპლუის ფეხბურთელისთვის, არამედ თავდამსხმელისთვისაც კარგი შედეგია.
"ულისესის” აღმასრულებელმა დირექტორმა გაგიკ გალსტიანმა ინტერნეტ-გამოცემა Armsport-თან საუბარში განაცხადა, რომ ქართველი ფეხბურთელი ერევნელებთან კონტრაქტს გუნდის სომხეთში დაბრუნების შემდეგ გააფორმებს. მანწკავამ, რომელმაც სეზონი მარტვილის "მერანში” დაიწყო, "ულისესს” მას მერე შეემატა, რაც სომხები საქართველოში მოსამზადებელი შეკრების გასავლელად ჩამოვიდნენ. მან ერევნელთა რიგებში ზუგდიდის "ბაიას” წინააღმდეგ ამხანაგური მატჩიც ჩაატარა.
შეგახსენებთ, რომ "ულისესს” ირანული "მესიდან” დაუბრუნდა გიორგი კრასოვსკი, რომელიც კლუბთან ახალ ხელშეკრულებას ასევე ერევანში გააფორმებს.

"ულისი" სომხეთის მოქმედი ჩემპიონია. სომხეთის ჩემპიონატი, რომელიც გაზაფხული-შემოდგომის სისტემით ტარდება, ჯერ არ დაწყებულა.