ესპანურ შეკრებაზე მყოფმა საქართველოს ჩემპიონმა ს/კ "ზესტაფონმა” მარბელიას ტურნირზე მეორე მატჩი ითამაშა. ამჯერად გიორგი ჭიაბრიშვილის გაწვრთნილთა მეტოქე რუმინეთის II დივიზიონის ერთ-ერთი ლიდერი, ტიმიშოარას "პოლიტეხნიკა” (გუნდი 2011-ში პირველი დივიზიონის ვიცე-ჩემპიონი იყო, მაგრამ ფინანსური საკითხების მოუგვარებლობის გამო, რანგით დააქვეითეს) იყო. იმერლებმა ეს სპარინგიც წააგეს, თუმცა წინა მატჩებისგან განსხვავებით, ისე, რომ თავად ვერ შეძლეს გოლის გატანა - 0:3.
რუმინელებთან "ზესტაფონმა” ასეთი შემადგენლობა ათამაშა:
I ტაიმი - კვასხვაძე; ღონღაძე, გიორგი ონიანი, საჯაია, ელიავა; გორგიაშვილი, ბაბუნაშვილი, აფციაური, შოთა გრიგალაშვილი; წინამძღვრიშვილი, დვალი.
შეცვლაზე შევიდნენ: რაჟამაშვილი, კობახიძე, შარიქაძე, მენთეშაშვილი, სამუშია, გაგოშიძე, თორნიკე გრიგალაშვილი, შოთა გრიგალაშვილი.
ტურნირისა და საერთოდ, ესპანური შეკრების დასკვნით მატჩს ზესტაფონელები 9 თებერვალს, რუსული პრემიერლიგის ბინადარ სამარის "კრილია სოვეტოვთან” გამართავენ. ეს გახლავთ Marbella ჩუპ-2012-ის მე-7-ადგილოსნის გამოსავლენი პაექრობა. მიმდინარე გათამაშებაში ქართველების მსგავსად რუსებმაც 2 მატჩი წააგეს. სტარტზე სამარელებს კიევის "დინამომ” 2:0 მოუგო, ორშაბათს კი, მოსკოვის ცსკა-მ - 1:0.