თბილისის "ვიტ ჯორჯიამ” თურქეთის კურორტ ბელეკში მეორე ტესტ-მატჩი გამართა და სანკ-პეტერბურგის "ზენიტის” სარეზერვო გუნდს ფრეზე გაეყარა – 0:0. ვიტელთა საიტის ცნობით, მატჩმა მათი დიდი უპირატესობით ჩაიარა. პირველ ტაიმში ბესიკ ჩიმაკაძეს, ბექა ზაქრაძეს და ორჯერ გიორგი კორიფაძეს ჰქონდათ გოლის გატანის რეალური შესაძლებლობა. გურამ ადამაძემ მაინც შეძლო სტანდარტულიდან მეტოქის კარის აღება, მაგრამ მსაჯმა საეჭვო გადაწყვეტილება მიიღო და თამაშგარე დააფიქსირა.
"ზენიტის” სარეზერვო გუნდი ორგანიზებულად იცავდა საკუთარ კარს და სწრაფ კონტრშეტევებს ახორციელებდა. მათ შემადგენლობაში განსაკუთრებით გამოირჩეოდნენ "ზენიტის” პირველი გუნდის წევრები: იგორ ჩემინავა და დენის ტერენტიევი.
მეორე ტაიმში ზურაბ ბერიძემ მთლიანად ახალი შემადგენლობა გამოიყვანა, მოედანზე მხოლოდ დავით ხურცილავა დარჩა - გიორგი გეთიაშვილს უმნიშვნელო ტრავმა აქვს. ლევან კუხალეიშვილს მართებდა გოლის გატანა, მაგრამ მიზანმა უმტყუნა. ამის შემდეგ გიორგი ვაშაკიძეს ორჯერ შეეძლო ანგარიშის გახსნა, ერთხელ ძელს მოარტყა ბურთი. საბოლოოდ ფრე - 0:0. მატჩის შემდეგ ბერიძემ დადებითად შეაფასა საკუთარი ფეხბურთელების თამაში და აღნიშნა, რომ კმაყოფილია შეკრების მიმდინარეობით.
"ვიტ ჯორჯია”-"ზენიტი” (სარეზერვო) 0:0
"ვიტ ჯორჯია” პირველ ტაიმში: ძაძამია, ხურცილავა, ადამაძე, კასრაძე, ღანიაშვილი, გურამ გურეშიძე, ვასაძე, კორიფაძე, ჯანელიძე, ზაქრაძე, ჩიმაკაძე.
მეორე ტაიმში: დაუშვილი, ხურცილავა, კალანდია, გოგიაშვილი, ჯავაშვილი, ჯაყელი, დავლაშელიძე, ვაშაკიძე, გიორგი გურეშიძე, ჯუღელი, კუხალეიშვილი (71 წთ. ლობჯანიძე).
შეხსენებისთვის, პირველ მატჩში ვიტელებმა 1:1 ითამაშეს გერმანიის ობერლიგელ "შიონაიხთან”.
 

www.witgeorgia.ge