ბოლნისის "სიონისთვის” ახალი პატრონის მოძიების "შრომატევადი” პროცედურა დასრულდა. საბოლოოდ დადგინდა, რომ კომპანია "მადნეული” ქვემოქართლური გუნდის გენერალური სპონსორი არ იქნება. უმაღლეს ლიგაში დარჩენისთვის მებრძოლი "სიონი” 100 პროცენტით სახელმწიფოს კმაყოფაზე იქნება და მას სრულად ბოლნისის ადგილობრივი ბიუჯეტი დააფინანსებს.
სოსო ლალიაშვილი (ბოლნისის მუნიციპალიტეტის თავმჯდომარე): "როგორც იცით, გუნდი დღეის მდგომარეობით სატურნირო ცხრილის ბოლო საფეხურზე იმყოფება. ამიტომ გადავწყვიტეთ ს/კ ბოლნისის "სიონი” მთლიანად მუნიციპალური საკუთრება გახდეს. გათვალისწინებული გვაქვს 2012 წლის ბიუჯეტში ცვლილებების შეტანა, რაც უშუალოდ საფეხბურთო გუნდის დაფინანსებას შეეხება. მიმდინარე წლის მაისის ჩათვლით "სიონი” 600 ათასი ლარით დაფინანსდება. არ დავმალავთ, რომ გვაქვს პრეტენზია, "სიონი” უმაღლეს ლიგაში დარჩეს, მომავალში კი უფრო მაღალი მიზნებისთვის ვიბრძოლებთ”.
გამგებლისვე თქმით, გუნდის დაკომპლექტებაზე, შეკრების მოწყობასა და მისი ფუნქციონირებისთვის აუცილებელ კიდევ არაერთ საკითხზე, პასუხისმგებლობას "სიონის” ხელმძღვანელები კისრულობენ. ამ მხრივ კი, ბოლნისელთა რიგებში ცვლილება არაა - "სიონს” ისევ ლევან ბაჯელიძე გაწვრთნის.
გუნდიდან წასულებზე "მსოფლიო სპორტი” უკვე წერდა. იჯარის წესით მოთამაშე ლაშა კემუხტაშვილი, გამნათხოვრებელ "ტორპედოს” დაუბრუნდა. ქუთაისელთა გუნდთანვე მომავალი 5 წლით გააფორმა კონტრაქტი სამმა ექსსიონელმა - გიორგი რეხვიაშვილმა, გიორგი ქუცურუამ და ვალერი ბოლქვაძემ.
მოსულთა შორის ჯერ მხოლოდ სამის ვინაობა სახელდება. როგორც გაუწყეთ, მინდია ბობღიაშვილი ფოთის "კოლხეთმა” ბოლნისში დაბრუნებულად გამოაცხადა. მის გარდა, ქვემოქართლურ გუნდში მოთამაშეთა შორის, "ზესტაფონიდან” იჯარის წესით წამოსული საბა ლომია და ფინეთიდან დაბრუნებული 26 წლის გიორგი ხიდეშელი (იგი ბოლოს სუომურ კაკონენლიგის (ჩვენებური რეგიონალლიგა) ერთ-ერთი ზონის გუნდში თამაშობდა) სახელდებიან.