თურქულ შეკრებაზე გამგზავრებამდე, ქუთაისის "ტორპედოს” მიერ ოფიციალურად წარდგენილ ახალწვეულთა შორის თავდამსხმელი გიორგი რეხვიაშვილიც იყო, რომელსაც პრეზენტაციაზე #19 მაისური გადაეცა. ანთალიაში ყოფნისას, რიონისპირელთა მიერ გამართული 5 სპარინგიდან, გია გეგუჩაძემ მას 4-ში (საერთო ჯამში 150 წუთი) მისცა თავის გამოჩენის თავი.
როგორც ჩანს, ფორვარდმა მწვრთნელზე სასურველი შთაბეჭდილება ვერ მოახდინა, რადგან დიდი ალბათობით, რეხვიაშვილი ძველ გუნდში დაბრუნებას აპირებს. შეგახსენებთ, რომ ეს ფეხბურთელი გასულ დეკემბრამდე ბოლნისის "სიონის” რიგებში ირიცხებოდა, სადაც მიმდინარე ეროვნული ჩემპიონატის 13 მატჩი უგოლოდ ითამაშა.
"ტორპედოში” რეხვიაშვილთან კონტრაქტის ურთიერთშეთანხმების საფუძველზე გაწყვეტის თაობაზე ჯერ არაფერს ამბობენ. ერთადერთი, რაც ქუთაისურ გუნდთან მიმართებაში დადასტურებითაა ცნობილი, იმერლები ჩემპიონატის განახლებამდე კიდევ ერთ საკონტროლო მატჩს გამართავენ. 10 თებერვალს, "ტორპედოს” სპარინგ-პარტნიორობას მარტვილის "მერანი” გაუწევს. თამაში ქუთაისში შედგება, თუმცა, ბაზაზე, თუ ცენტრალურ სტადიონზე, ეს უკვე ამინდზე იქნება დამოკიდებული.
 

ფრიდონ კერვალიშვილი
www.fctorpedo.ge-ს ფოტო