მთავარ ფოტოზე სერგი ორბელაძე

ზამთრის პაუზისას დამატებულ 6 ფეხბურთელის შემდეგ ცხინვალის ”სპარტაკთან” კიდევ სამმა ფეხბურთელმა გააფორმა კონტრაქტი. ამ ტრიოდან ერთი ახალწვეულია, ორი მოთამაშე კი ჩვენი გუნდისთვის უცხო ნამდვილად არაა... მცველი სერგი ორბელაძე უკვე სპარტაკელია, ნახევარმცველმა ირაკლი სამხარაძემ და მცველმა ბადრი ტეტუნაშვილმა ჩვენს გუნდთან საკონტრაქტო ვადა გაახანგრძლივეს.

29 წლის მცველი სერგი ორბელაძე იანვრიდან მოყოლებული ვლადიმერ ხაჩიძის გუნდში ვარჯიშობს. ორბელაძემ ”სპარტაკის” რიგებში 4 ამხანაგურ მატჩში ითამაშა და მარტვილის ”მერანთან” საკონტროლო შეხვედრაში (2:2) ერთი გოლით შეეწია გუნდს. ”სპარტაკამდე” ორბელაძე თბილისის ”დინამოში”, უკრაინულ ”ილიჩევეცში”, მოლდოვურ ”დაჩიაში”, აზერბაიჯანულ ”სტანდარტსა”, ბოლნისის ”სიონსა” და რუსთავის ”მეტალურგში” ასპარეზობდა. სერგი ორბელაძემ, რომელმაც მიმდინარე სეზონი რუსთავის ”მეტალურგში” დაიწყო, ცხინვალის ”სპარტაკთან” გაფორმებული კონტრაქტის მიხედვით მიმდინარე ჩემპიონატს ჩვენს გუნდში დასრულებს.

ირაკლი სამხარაძე

 ასევე 29 წლის ირაკლი სამხარაძე ”სპარტაკს” მიმდინარე სეზონის დაწყებამდე, აგვისტოში შეუერთდა. მას, ჩვენს კლუბთან საკონტრაქტო ვადა უკვე ამოეწურა. ”სპარტაკმა” სამხარაძესთან კონტრაქტის ვადა მიმდინარე წლის მაისის ბოლომდე გაახანგრძლივა. შეგახსენებთ, რომ სამხარაძეს ტრავმის გამო, ”სპარტაკში” საკმაო პერიოდი გაუცდა და მხოლოდ 3 მატჩში ითამაშა. ირაკლი სამხარაძე უკვე მწყობრშია და უკვე სამი კვირაა, რაც გუნდთან ერთად სრული დატვირთვით ემზადება.

ბადრი ტეტუნაშვილი

მიმდინარე სეზონის ბოლომდე გაახანგრძლივა კონტრაქტი 22 წლის მცველმა ბადრი ტეტუნაშვილმა, რომელიც ”სპარტაკში” ”გაგრადან” არის განათხოვრებული. ”გაგრამ” ტეტუნაშვილს ჩვენს გუნდში განათხოვრების ვადა სეზონის ბოლომდე გაუხანგრძლივა და მცველმაც ამ ვადით გააფორმა ჩვენს კლუბთან ახალი კონტრაქტი. ბადრი ტეტუნაშვილმა მიმდინარე ჩემპიონატში, ”სპარტაკის” მაისურით 13 მატჩში ჩაატარა, აქედან 11 შეხვედრაში სასტარტო შემადგენლობაში იყო.

დაბოლოს, ”ბენდელას თასის” გათამაშებაზე ”სპარტაკი” 14 თებერვალს, მე-3 ადგილისათვის მატჩში თბილისის ”დინამოს” ეთამაშება. ამავე დღეს შედგება ფინალური მატჩი, რომელშიც თასისთვის ერთმანეთს თბილისური გუნდები, ”ვიტ ჯორჯია” და ”ზოოვეტი” დაუპირისპირდებიან. მანამდე კი, ორშაბათს 13 თებერვალს ჩვენი კლუბის მთავარი გუნდი რუსთავში ”მეტალურგს” ამხანაგურ მატჩში გაეჯიბრება. ეს თამაში ”ფოლადის” სტადიონზე 14 საათზე დაიწყება.

http://fcspartak.ge