გორის ”დილა" თურქეთში მზადებას აგრძელებს. თემურ მახარაძის გაწვრთნილები მორიგ საკონტროლო მატჩში რუმინეთის პლოეშტის ”პეტროლულს" შეხვდნენ და მინიმალური სხვაობით დამარცხდნენ.

”დილა": სკენდერი - ალადაშვილი, თოთაძე, სალუქვაძე, მეგრელიშვილი - კანდელაკი, კრნჟინაცი, არზიანი - ლექვთაძე, დ. ჩაგელიშვილი, კახელიშვილი
შეცვლაზე შევიდნენ: ქარზქუზაშვილი, ბარაბაძე, ხოჯავა, ხუბუა, ჯიქია, შ.კაშია.
გააძევება: ხოჯავა

”დილას" მთავარმა მწვრთნელმა თემურ მახარაძემ პირველად ათამაშა გუნდის ახალწვეული გოჩა ხოჯავა. ნიჟნი ნოვგოროდის ”ვოლგას" ყოფილი ნახევარმცველი მოედანზე მეორე ტაიმში გამოჩნდა, მაგრამ მალე ორი ყვითელი ბარათი მიიღო, გააძევეს და გუნდს ბოლომდე ვერ დაეხმარა.

რუმინელებმა ერთადერთი გოლი მეორე ტაიმში გაიტანეს და 1:0 მოიგეს.

”დილა" მორიგ სპარინგს ასევე რუმინულ გუნდ ”ვოინტრა სიბიუსთან" დღეს ჩაატარებს, ბოლო საკონტროლო შეხვედრა კი 5 თებერვალს ბელარუსულ ”ბატესთან" არის დაგეგმილი.

ჯერ გაურკვევლია, დარჩებიან თუ არა გორელთა გუნდში ხორვატი მეკარე მარინ სკენდერი და სერბი ნახევარმცველი ვლადიმირ კრნჟინაცი. არ უთამაშია მათე ვაწაძეს, რომელსაც კუნთი ჰქონდა დაჭიმული, მაგრამ გუშინ ”დილასთან" ერთად სრული დატვირთვით ივარჯიშა.

”დილას" სამი დღის წინ შეუერთდა საქართველოს ახალგაზრდული ნაკრების წევრი ივანე კანდელაკი, რომელიც ბოლოს რიგის ”სკონტოში" თამაშობდა.

ყოველდღიური სპორტული გაზეთი "ლელო"